Futbola XX mende hasieran iritsi zen Gironara eta lehenengo taldea Strong Esport historikoa izan zen. 20. hamarkadan CE Gironí eta Unió Esportiva Girona sortu ziren baina bigarren hau ekonomia arazoengatik desagertzean talde indartsu bakarra eratzea erabaki zen eta 1930an Girona Futbol Club sortu zen. 1936an Bigarren mailara igo zen.
Gerra Zibilaren ondoren bigarren eta hirugarren mailen artean aritu zen baina 1959 eta 1977 artean hirugarren mailatik igo ezinik ibili zen.
2007-08 denboraldian Raül Agné entrenatzailearen eskutik bigarren mailara itzultzea lortu zuen eta 2013an lehen mailara igotzeko play-offak jokatu zituen, ez zuen ordea bere helburua lortu. Hurrengo denboraldia kaskarragoa izan zen eta azken partidararte itxaron behar izan zuen salbazioa lortzeko.
2014-15 denboraldia goiko postuetan ibili zen, sailkapen buru ere bai hainbat jardunalditan. Azken partida etxean zuen, baina Lugok luzapenean sarturiko golaren erruz bigarren postua galdu eta play-offa jokatzea egokitu zitzaion. Zaragozaren aurka izan zuen lehen kanporaketa, eta Romaredan 0-3 irabazita kataluniarrak pozik ziren arren etxean 1-4 galdu eta igoerarik gabe gelditu ziren. 2015-16 denboraldian laugarren egin ondoren berriz jokatu zituen play-offak baina finalean ezin izan zuen Osasuna garaitu. Azkenik 2016-17 denboraldian lortu zuen igotzea, Ligan bigarren egin ondoren. Debuta egin zuen urtean maila ona erakutsi zuen, urtean zehar Europako postuetatik gertu ibili zen, eta azkenean 10. amaitu zuen. 2018-19 denboraldia ere txukun hasi zuen eta Errege Kopako final laurdenetara iritsi zen, baina bigarren itzulia oso txarra egin eta azken jardunaldian maila galdu zuen.
2020an Ligan bosgarren egin eta igoera play-offak jokatu zituen. Finalean Elx CF izan zuen aurkari. Joanekoan 0-0 egin ondoren itzulerakoan alacantarrek 96. minutuan sarturiko gol bakarraren erruz saririk gabe gelditu zen. 2022an azken jardunaldian lortu zuen play-offetara sailkatzea eta lehenengo Eibar eta ondoren Tenerife kanporatuta Lehen mailara itzuli zen.
2023-2024 denboraldian eraldaketa sakona izan zuen taldeak. Hainbat jardunalditan liderra ere izan zen baina azkenean 3. postuan amaitu zuen. Lehenengo aldiz sailkatu zen Europako txapelketa bat jokatzeko, Txapeldunen Liga gainera. Denboraldiko pitxitxia ere taldean izan zuen, Artem Dovbyk ukrainarra.
2024-2025 denborladian nekea somatu zitzaion. Txapeldunen Ligan ligaxkako fasean 36 taldetatik 33.a izan zen partidu bakarra irabazi (Slovan Bratislavaren aurka etxean) eta zazpi partida galduta. Denboraldiaren amaieran maila mantentzeko lanetan ari da.
14.624
Datuak: Q11945
Multimedia: Girona Futbol Club / Q11945.png){kind=small}