Hemiziklo

Taorminako greziar antzokia, hemiziklo itxura duena.

Hemizikloa (grezierazko εμι emi, erdi eta κuκλοs kyklos zirkulu hitzen lotunea) jardunaldi, hitzaldi, biltzar edo kidekoetarako aretoa da, bereziki legebiltzarrekoa, eserlekuak, zirkuluerdia osatzen duten ilaretan eta erdira begira dauzkana. Terminoak, oro har, forma arkitektoniko konkaboa adierazten du, hala nola Plebiszituaren plaza (Napoli) edo Errepublikaren plaza (Erroma) ospetsuarenak. Askotan, absidearen forma izendatzeko ere erabiltzen da.

Arrazoi estetikoek, sinbolikoek, praktikoek edo estilistikoek justifika dezakete forma kurbatua duen oinplanoa aukeratzea, zuzena aukeratu beharrean. Hala, forma zirkularrak edo obalak eszenografia-efektua eman diezaioke plaza bati. Hori da Erromako San Petri plazaren kasua. Beste batzuetan, eskakizun praktikoak nagusitzen dira, hala nola hemizikloa greziar antzokietan erabiltzean. Eszenatokiaren inguruan eraikitako harmaila (cavea) batean eserita egonez gero, jendea hobeto zegoen.

Bestalde, argi dago angeluaren irekierak ez duela zertan zirkuluerdiarenarekin bat etorri. Antzerki grekoaren kasuan, adibidez, 180 gradutik gorakoa zen.

Antzerki grekoaren hemiziklotik dator, modu metaforikoan, hitz hori erabiltzea parlamentu bat edo antzeko areto bat adierazteko (adibidez, Madrilgo Diputatuen Kongresua edo Parisko Nazio Biltzarra) edo areto horretan biltzen diren organoak adierazteko.

Kanpo estekak

• Datuak: Q2528224
• Multimedia: Hemicycles / Q2528224