Likido sinobial

Wikipedia, Entziklopedia askea
Jump to navigation Jump to search
Artikulazio sinobiala

Likido sinobial edo sinobia isurkari gardena eta likatsua da, artikulazioak lubrifikatzen dituena. Zuringoaren itxura du. Bere funtzio labaingarriari esker kartilago eta artikulazioen arteko marruskadura nabarmen murrizten da.

Bere osaketari dagokionez, proteina eta zelula gutxi batzuk ditu, eta azido hialuroniko ugari.

Mintz sinobialak sortzen du. Kopuru txikitan egon ohi da artikulazioetan, baina traumatismoen ondorioz edo hanturazko gaitzen ondorioz (artritis erreumatoidearen ondorioz, esaterako) kopuru handitan egon daiteke, artikulazioko isuria eta min handia agertuz.

Artrozentesia likido sinobialaren ateratzeari deritzo. Bi arrazoiengatik egin ohi dute sendagileek: mina arintzeko, artikulazioko isuria dagoenean, eta bere azterketa klinikoa egiteko, gaitz baten diagnostikoan asko laguntzen duena. Artrozentesia xiringa esteril baten bidez burutzen da.

Likido sinobialaren azterketa bere ezaugarri biokimikoak, mikrobiologikoak, immunologikoak eta zitologikoak kontuan hartu behar ditu. Ohikoa da ere kristalen bilaketa, hezueriaren diagnostikoa errazten duena.