Napoli

Napoli Napoli
Italiako udalerria
Irudi gehiago
Administrazioa
Herrialdea	Italy
Italiako eskualdeak	Campania
Italiako hiri metropolitarra	città metropolitana di Napoli
Alkatea	Gaetano Manfredi
Izen ofiziala	Napoli
Jatorrizko izena	Napoli
Posta kodea	80121, 80122, 80123, 80124, 80125, 80126, 80127, 80128, 80129, 80131, 80132, 80133, 80134, 80135, 80136, 80137, 80138, 80139, 80141, 80142, 80143, 80144, 80145, 80146 eta 80147
ISTAT kodea	063049
Geografia
Koordenatuak	40°50′09″N 14°14′55″E
Azalera	119,02 km²
Altitudea	17 m
Mugakideak	Arzano, Casavatore, Casoria, Marano di Napoli, Melito di Napoli, Mugnano di Napoli, Pozzuoli, Quarto, San Giorgio a Cremano, San Sebastiano al Vesuvio, Volla, Casandrino, Portici eta Cercola
Demografia
Biztanleria	913.462 (2023ko urtarrilaren 1a)
Dentsitatea	7.675 bizt/km²
Informazio gehigarria
Telefono aurrizkia	081
Ordu eremua	UTC+01:00 eta UTC+02:00
Hiri senidetuak	Gafsa, Palma Mallorcakoa, Sighetu Marmației, Călărași, Kragujevac, Budapest, Atenas, Santiago, Nosy Be, Nablus, Benevento, Naples, San Frantzisko, Toronto, Milan, Kagoshima, Praga, Buenos Aires, Baku, Sarajevo, Marseilla, Zhengzhou, Córdoba, Valencia, Grottammare, Formia, Mysłowice, Jidda, Honolulu konderria, Wenzhou, Ramallah eta Rio de Janeiro
Katastro kodea	F839
Sailkapen sismikoa	2 (Ertaina)
Matrikula	NA
Hizkuntza ofiziala	italiera
comune.napoli.it

Napoli edo Napoles (italieraz Napoli) Italiako Campania eskualde eta probintziako hiriburua da. Italiako hirugarren hiria da biztanle kopuruari dagokionez, eta biztanle-dentsitate handiko (Italiako eta Europako jendetsuenetako) metropoli-eremu bateko bihotza da.

Izen bereko golkoaren erdigunetik hurbil dago, Vesuvio sumendiaren eta Campi Flegrei deritzan eremu bolkanikoaren artean. Hiriaren ondare artistikoa eta arkitektonikoa oso aberatsa da; horregatik, 1995ean, UNESCOk gizateriaren ondare izendatu zuen Napoliko parte zaharra, Europako hirigune historikorik zabalena.

Italiako hirugarren udalerririk jendetsuena da, eta Europar Batasunean biztanleriaren dentsitaterik handienetakoa duten metropoli eremuetako bat du.

Geografia

Mugakideak

Napolik honako udalerri hauekin egiten du muga:

Arzano
Casavatore
Casoria
Marano di Napoli
Melito di Napoli
Mugnano di Napoli
Pozzuoli
Quarto
San Giorgio a Cremano
San Sebastiano al Vesuvio
Volla
Casandrino
Portici
Cercola

Klima

Datu klimatikoak (Napoles)
Hila	Urt	Ots	Mar	Api	Mai	Eka	Uzt	Abu	Ira	Urr	Aza	Abe	Urtekoa
Batez besteko tenperatura maximoa (°C)	12.5	13.2	15.2	18.2	22.6	26.2	29.3	29.5	26.3	21.8	17.0	13.6	20.4
Batez besteko tenperatura (ºC)	8.1	8.7	10.5	13.2	17.3	20.9	23.6	23.7	20.8	16.7	12.3	9.3	15.9
Batez besteko tenperatura minimoa (°C)	3.8	4.3	5.9	8.3	12.1	15.6	18.0	17.9	15.3	11.6	7.7	5.1	10.4
Pilatutako prezipitazioa (mm)	104.4	97.9	85.7	75.5	49.6	34.1	24.3	41.6	80.3	129.7	162.1	121.4	1006.6
Prezipitazio egunak (≥ 1.0 mm)	9.9	9.8	9.5	8.8	5.7	4.0	2.3	3.8	5.8	8.1	10.8	10.7	89.2
Eguzki orduak	114.7	127.6	158.1	189.0	244.9	279.0	313.1	294.5	234.0	189.1	126.0	105.4	2375.4
Iturria: World Meteorological Organization (Nazio Batuen Elkartea), eguzki orduak

Auzoak

1. Pianura 2. Bagnoli 3. Posillipo 4. Fuorigrotta 5. Soccavo 6. Chiaiano 7. Arenella 8. Vomero 9. Chiaia 10. San Ferdinando

11. Montecalvario 12. San Giuseppe 13. Avvocata 14. Porto 15. Pendino 16. San Lorenzo 17. Mercato 18. Vicaria 19. Stella 20. San Carlo all'Arena

21. Piscinola-Marianella 22. Scampìa 23. Miano 24. Secondigliano 25. S.Pietro a Patierno 26. Poggioreale 27. Zona Industriale 28. San Giovanni a Teduccio 29. Barra 30. Ponticelli

Historia

Kumasko biztanleek sortu zuten K.a. VIII. mendean, Parthenope izenarekin; K.a. VI. mendearen bukaeran, Kumasko oligarkek birsortu egin zuten Neapolis (hiri berria) izenarekin, bigarren Kumas bat izateko asmoz; baina, berehala, hiri berria nagusitu egin zitzaion "hiri ama"ri eta Magna Graecia delakoko hiri nagusietako bat bihurtu zen, Atenasekin zeuzkan harreman estuei esker; gainera, eragin handia eduki zuen inguruetako herri italikoengan eta Mediterraneo aldean, merkataritzaren, erlijioaren eta kulturaren ikuspegitik.

K.a. 326an, erromatarrek konkistatu zuten, baina greziarren garaiko nortasun eta erakundeei eutsi egin zieten Bizantziopean geratu zen arte. Bitarte luze horretan, enperadoreen eta patrizio erromatarren oporleku bihurtu zen eta hiriak garrantzi handia eskuratu zuen kulturaren ikuspegitik, bereziki K.a. I. mendean eta K.o. I. mendean.

Erromatar inperioa erori ostean, hiriak dukerri bat osatu zuen VII. mendean, Bizantziar inperiotik aske; geroago, XIII. mendetik hasi eta seiehun bat urtez, Napoliko erreinuko hiriburua izan zen. Ondoren, Aragoiko inperioko gune politikoa bihurtu zen. XVI. eta XVII. mendeen bitartean, Napoli hiria 400.000 biztanle izatera heldu zen, eta, beraz, Konstantinopolis eta gero, Europako eta Mediterraneoko hiririk jendetsuena izan zen.

Napoliko Erresumako eta Bi Sizilietako Erresumako hiriburu izan zen, Italiako erresuma batu baino lehenago; batasunaren ondoren, hiriak halako gainbehera sozio-ekonomikoa izan zuen, Italiako hegoalde osoak bezala.

1857ko abenduaren 16an lurrikara batek 13.000 hildako inguru eragin zituen hirian.

Napoliko badia eta Vesuvio sumendia

Ondarea

Baliabide kultural eta monumentuei dagokienez, Napoli munduko dentsitaterik handiena duten hirien artean dago; alde zaharrean, arkitektura-estilo ugari topa daitezke, 2.800 urteko historian zehar bertan egondako hamaika zibilizazioen lekuko, eta, azalera ez oso handia izan arren, hainbat gaztelu, errege egoitza, jauregi monumental eta eliza historiko daude, besteak beste, bai eta garai klasikoko arrasto ugari ere. Ondare hori hiri osoan zehar ez ezik, inguruetan ere mirets daiteke eta horregatik esaten da, hain zuzen ere, Napoli "aire zabaleko museo" baten antzeko zerbait dela.

Hala ere, arreta eskasaren eta zaharberritze lanak egiteko inbertsiorik ezaren ondorioz, ondare horren zati bat hondatuta edo hondatzeko bidean dago (alde zaharrean, adibidez, 160 eliza baino gehiago eta beste hainbeste jauregi daude egitura-arazo larriak dituztenak; eta berdin gertatzen da iturri, obelisko eta eraikin zahar askorekin ere). Egoera larri horri aurre egiteko asmoz, hainbat elkartek UNESCOren esku hartzea eskatu du.

Eraikin militarrak

Greziarren garaietatik, hiriak bazituen harresi batzuk, egitura karratu batez eginak gaur egungo hiriaren erdialdea den lekuan eta honako muga hauekin: iparraldean, via Foria; hegoaldean, corso Umberto I; mendebaldean, via San Sebastiano; eta ekialdean, via Carbonara. Erromatarren garaian ere existitu ziren; baina aldaketa handi samarrak egin behar izan ziren K.o. 79. urtean, Vesuvioaren erupziotik ihes egindakoei harrera egiteko, bai eta geroago ere, Valentiniano III.a enperadorearen garaian ere.

Napolik atzerritar jatorriko hainbat agintari-leinu ezagutu ditu historian zehar, eta horregatik gotorleku sendoak eraiki behar izan ziren. Hiriko lehen bi gazteluak, dukerriaren garaikoak dira: haietako bat Castel dell'Ovo, itsasoaren gainean bertan eraikia, Licinio Luculloren villaren hondakinen gainean, hiriko kostaldea babesteko, kostaldeko marraren erditsuan egonda; bigarrena, Castel Capuano, 1153an eraikia, Gilen I.a Siziliakoaren borondatez, errege-egoitza izateko, baina baita barrualdeko lurraldea defenditzeko ere.

Anjoutarren garaian, hiriko harresiek 4,5 km-ko perimetroa zuten, 200 hektareatako eremu batean, non 30.000 biztanle bizi baitziren. Aldaketa batzuk egin ziren XIII. mendean, Karlos I.a Napolikoaren garaian, Castel Nuovo gazteluraino; baita geroago ere, 1484an, aragoitarren garaian, Castello del Carmine sartuz. Garai hartan, beste hiru gaztelu eraiki ziren: Maschio Angioino edo Castel Nuovo delakoa, errege-egoitza bihurtu zena; Castel Sant'Elmo, gain batean egonda, hiria kontrolatzeko betekizuna zuena; eta Castello del Carmine izenekoa.

Espainiarren erregeordetzaren garaian, beste harresi-lan batzuk egin ziren, eta, horrela, 1656rako, 400.000 biztanle bizi ziren harresien barruko eremuan. Garai hartakoak dira, orobat, Nisidako gaztelua eta Viglienako gotorlekua. Caserma Garibaldi izenekoa da hirigunean eraikitako azken gotorlekua, Italiaren batasuna baino apur bat lehenagokoa. Badira harresietatik kanpo eta inguruetan ere beste gaztelu, konbentu edo jauregi gotortu batzuk ere.

Gerrako teknika berrien garapenaren ondorioz, harresiak balioa galduz joan ziren, erabat desagertu ziren arte. Jatorrizko harresietan, bazeuden zenbait dorre ere txandaka, hasieran toba harriz eginak eta geroago laba-harriz; era berean, harresiek hainbat ate ere bazituzten, zeinen hondakinen bat geratzen den oraindik, hala nola Porta Medina (1640), Montesanto aldean; porta San Gennaro (1573), piazza Cavour delakoan; porta Capuana eta Porta Alba (1625), gaur egungo piazza Dante delakoan. Dorretatik batzuk iritsi dira gaurko garaira: Ranieri dorrea eta San Domenico dorrea.

Eraikin erlijiosoak

Harresitik kanpoko katakonba kristauek Napoliko arte, historia eta arkitektura kristauaren lehenengo lekukotasuna ematen digute. Napolik historian zehar jasandako atzerritarren menderakuntzek ere eragin nabarmena izan zuten hiriaren erlijiozaletasunean, Anjoutarren eta Aragoitarren erreinaldiek bereziki; hurrengo mendeetan hiria oso lotuta egon zen Kontrarreformarekin, Espainiako Habsburgotarren menpe baitzegoen.

XVII. mendean ehun bat komentu eta monasterio zeuden Napolin, eta XVIII. mendean 500 eliza inguru; hori dela eta, 500 kupulen hiria goitizena jarri zioten. Garai modernoagoan, lurrikarek eta batez ere Bigarren Mundu Gerran izandako 181 bonbardaketek hiriko 60 elizatik gora suntsitu zituzten.

Gaur egun, oraindik ere Napoli da munduan eliza, komentu eta bestelako eraikin erlijioso kopuru handiena duen hiria. Eliza historikoak soilik kontuan hartuta, kopurua bereziki handia da: 448, guztira. Horien artean daude San Fernando eliza, San Frantzisko Paolakoa basilika, San Martinen kartusia eta Santa Chiara basilika eta monasterioa.

Eliza asko, ordea, itxita daude beti, aspaldi-aspalditik, edo bertan behera utzita daude, inolako zainketarik gabe, nahiz eta askotan balore artistiko handiko obrak eduki (via Costantinopoli-ko Santa Maria della Sapienza elizak, esaterako, Luca Giordanoren margolanak eta barrualde barroko aberats bat ditu).

Errege egoitzak

Napoli hiriak benetako eta berezko bi errege egoitza ditu: Palazzo Reale eta Capodimonte jauregia, nahiz eta badiren beste leku batzuk errege eta estatu buruen egoitza izandakoak. Palazzo Reale jauregiak Piazza del Plebiscitora darama eta Europako errege jauregi baten ohiko modura eraikita dago. XVII. mendean hasi ziren eraikitzen eta errege egoitza ofiziala izan zen, baita Savoia etxearen erregealdian ere, 1946ra arte. Jauregi barruan hainbat estilo arkitektoniko eta artistiko elkartzen dira; garrantzi monumentala aipagarria dute dutenak marmolezko ohorezko eskailerek eta 1841eko lorategi exotikoak. Aurrealdea XIX. mendekoa da eta hiria zuzenean edo zeharka gobernatu duten monarka garrantzitsuenen estatuekin dago apainduta: Ruggero Normandiakoa, Frederiko II.a Suebiakoa, Karlos I.a Anjoukoa, Alfontso I.a Aragoikoa, Karlos V.a Habsburgokoa, Karlos III.a Borboia, Joachim Murat eta Viktor Emanuel II.a Savoiakoa.

Karlos III.a Borboiak bigarren errege egoitza bat eraikitzeko agindu zuen, Capodimonten. Jauregia Ilustrazioaren oinarriekin bat zetorren hiri plangintza bati jarraituz eraiki zen eta hiriko berdegunerik handiena du inguruan. Bertan, Fernando IV.a eta Joachim Murat ere bizi izan ziren; azkenik 1950ean, Museo Nazional bihurtu zen eta pinakoteka garrantzitsua eta portzelana bilduma aipagarria ditu.

Gazteluak

Maschio Angioino gaztelua.

Castel dell'Ovo.

Napolik Erromatar Inperioko hiriburuaren babes paregabea jaso zuen luzaroan (batez ere hiriburutik hurbil egoteari esker), baina aro klasikotik Erdi Arora igarotzean, berriz ere bere kabuz defendatu behar izan zuen bere esparrua. Kostako hiria izanik, barrualdean defentsa naturalik gabea, gainera, setio ugari jasan zituen, batez ere dukerri autonomoa izan zen garaian; izan ere, garai hartan, hiria gerra andana jarrai eta ia etengabe batean sartuta egon zen (gehienak defentsarako) Benevento, Salerno eta Capuako printzerri lombardiarren aurka, bizantziar inperioen aurka, aita santuen aurka eta, azkenik, Normandiarren aurka, horiek 1137an hiria guztiz konkistatzea lortu zuten arte.

Egun, jatorrizko egitura bere horretan duten defentsa-gazteluak sei dira: hiriko alde zaharrean bost daude (Maschio Angioino edo Castel Nuovo (Gaztelu Berria), Castel Capuano, Castel Sant’Elmo, Castel dell’ovo eta Garibaldi kaserna, gaztelu gotortu moduan eraiki zutena), eta bestea kanpoaldean, Nisida gaztelua, anjoutarren garaiaren amaierakoa; gaur egun, adin txikikoentzako zentro bat dago bertan. Horiez gain, beste bi gaztelu daude: Viglienako gotorlekua eta Carmine gaztelua. Hirian badira beste eraikin batzuk gaztelu forma eta itxura dutenak (Aselmeyer gaztelua, adibidez), baina haien interes historikoa egituraren balio artistiko eta dekoratiboan baino ez datza. Azkenik, badira kasernaz osatutako hainbat eraikuntza militar ere, gehienak XIX. mendearen bigarren erdian eraikiak.

Napoliko lehen gazteluek gehienbat errege egoitzen funtzioa betetzen zuten: Karlos I.a Anjoutarrak Gaztelu Berria eraikitzea erabaki zuen batik bat bertan bizitzeko. Aragoitarren dinastiak haren egiturak berreraiki zituen, eta hala, anjoutarren eraikinetatik ez zen ezer geratu, Santa Barbara kapera izan ezik. Gazteluaren irudirik ez dagoenez, lehengo anjoutarren gaztelua gaur egun Frantziako ipar-mendebaldeko Anjou aldean dauden eraikinen antzekoa izango zela uste da.

Inguru naturala

• Vesuvio sumendia.

Kirola

• SSC Napoli, futbol taldeak Stadio San Paolo estadioan jokatu ohi ditu etxeko partidak. Bi Scudetto, Italiako 6 Kopa, Italiako Superkopa bat eta UEFA Kopa bat dauzka.

Napolitar ospetsuak

• Gian Lorenzo Bernini (1598-1680), eskultorea.
• Luca Giordano (1634-1705), margolaria.
• Domenico Scarlatti (1685-1757), musikagilea.
• Karlos IV.a Borboikoa (1748-1819), erregea.
• Enrichetta Caracciolo (1821-1901), idazle eta kazetaria.
• Grazia Pierantoni Mancini (1841-1915), idazlea.
• Ruggero Leoncavallo (1857-1919), musikagilea.
• Viktor Emanuel III.a Italiakoa (1869-1947), erregea.
• Enrico Caruso (1873-1921), tenorra.
• Totò (1898-1967), aktorea.
• Bud Spencer (1929-2016), zine-aktore eta zuzendaria.
• Angela Pagano (1937-2024), aktore eta abeslaria.
• Elena Ferrante (1943), idazlea.
• Maurizio de Giovanni (1958), idazlea.
• Paolo Sorrentino (1970), zine-zuzendaria.
• Roberto Saviano (1979), idazle eta kazetaria.

Iruditegia

• 
  Santa Maria della Sanità basilikaren kupula.
• 
  Il Duomo (katedrala).
• 
  Pizza Margherita, napolitar pizza tradizionala.
• 
  Chiesa del Gesù Nuovo eliza.
• 
  Capodimonte jauregi eta museoa.
• 
  Umberto I galeria.
• 
  Santa Chiara elizako klaustroa.

Camorra eta hiri-degradazioa

Artikulu nagusia: «Camorra»

Camorra

Artikulu nagusia: «Camorra»

Onartuen dauden teorien arabera, Camorra izenez ezagutzen den mafia napolitarra Kanpaniako eskualdean sortu zen XVI-XVII. mendeen artean, nahiz eta XIX. mendearen hasierara harte ez zen prestatu erakunde kriminal sekretu gisa. Uste da, monarkia Borbonikoak ongi egituratutako Estatu bat sortzeko interes ezatik abiatuta eratu zela, justiziaren eta barne-segurtasunaren administrazioa, tokiko buruzagi eta matoien esku utzita. «Camorra» terminoaren etimologia zalantzazkoa da, eta interpretazio asko ditu, baina onartuena, «camorra» terminoa napoliar c'a morra termino dialektaletik datorren tesia da (literalki, taldearekin, Napolin morra joko ezaguna egiten zuten kaleko taldeei erreferentzia eginez). Izen horrekin, Napoliko erreinuan prostituzio eta ausazko jokoak kontrolatzen zituzten gaizkile taldeak ere bereizten ziren, 1300. urtetik, 1800era. Hedaduraz, camorrista terminoa maton edo liskartsu hitzaren sinonimo izatera pasa da, kimerista hitzaren sinonimo gisa, eta horregatik, gaztelaniaz "camorra" hitzak liskarra edo borroka esan nahi du.

Bere kideak, camorristi izendatuak, kontrabandoa, xantaia (zerga ospetsua edo pizzo), eroskeria, lapurreta eta hilketa jarduerekin erlazionatu ziren. Siziliako Mafia ez bezala, Camorra politikari eta indar armatuetatik urrun egon zen (noizean behin izan ezik). Bakarrik Fernando IV.arekin eta Frantzisko II.a Bi Siziliakoarekin izan zuen kolaboratzeko ahalegina, baina luzarora ez zuen onurarik ekarri bi aldeentzat. Camorrak aurrera egin zuen italiar bateratzearen aldeko borrokan Italian gertatu ziren gatazketan: erakundea Giuseppe Garibaldi nazionalista italiarraren indarrekin aliatu zen, eta Borboiak herrialdetik kanporatzen lagundu zuen. Italiaren bateratzearen ondorengo aldian (1861. urtean), camorristak polizia-gorputzean sartzeko alferrikako ahalegina egin zen. Camorraren boterea izugarri ahuldu zen bere kideak hilketaz akusatu zituztenean eta 1911. urtean epaiketara eraman zituzten. Elkarte hau ia desagerrarazi zen 1922. urtean Benito Mussoliniren gobernu faxistaren eskutik.

Mafia siziliarrak duen beste desberdintasun esanguratsu bat maila altuenetan dagoen hierarkiaren falta erlatiboa da, nahiz eta 1970. eta 1990. urteetan Camorra hierarkizatzeko saiakerak egon ziren. Honen bultzatzaile nagusiena Raffaele Cutolo kapoa izan zen, Nuova Camorra Organizzataren sortzailea. XXI. mendearen hasieran, Camorraren ezaugarririk garrantzitsuena bere zatiketa nabarmena zen, eta horrek familia kriminalen arteko liskar ugari eragin zituen, buruzagien ondorengotzagatik eta eragin-eremuen konkistagatik. 2004a urterik gogorrena izan zen, 139 pertsona hil zirelako "Scampiako guduan". Garai hartan, auzo hori Europako droga-hipermerkaturik garrantzitsuentzat jotzen zen (gerora, Milango Rogoredo auzoari eman dion izena).

Hiri-degradazioa

Camorraren presentzia gehien dituzten bi auzoak Scampìa eta Secondigliano dira, zalantzarik gabe. Hiriaren iparraldean kokatuta daude, eta garraio- eta zerbitzu- gabezia nabarmenak dituzte. Hasiera batean, Secondigliano zerotik planifikatu zen arkitektura faxistaren printzipioetan oinarrituta, hiriko barruti berri bat bezala. Baina 15. barrutia Kanpania osoa astindu zuen Irpiniako lurrikararen ondoren garatu zen batez ere, ia 3000 hildako eraginez eta kaltetuentzat 150 000 etxebizitza eraikiz. Lurrikara gertatu eta berehala, auzoak 17.000 pertsona jaso zituen oso baldintza zaurgarrietan, eta ondorengo eraikuntza-jarduera oparoak mesede handia egin zion Camorrari, eta praktikan lurraldea kontrolatzera igaro zen, bertako biztanleak narkotrafikoaren eta kontrabandoaren onurekin elikatuz, langabeziak eta eskola uzteak eraginda oso kaltetuak zeudenak.

2008. urtean, Matteo Garroneren Gomorra film italiarrak mafiak eragindako hiriko arazo ezberdinak islatzen ditu, krimen kopuruaren indize indartsua barne, batez ere, klanen gerrek eragindakoa, baita tokiko hautatuen baitan oso normalizatuta dagoen ustelkeriaren ondorioz.

1994. eta 2012. urteen artean, hirian eta Campania eskualdeko gainerako lekuetan, zaborren kudeaketari buruzko larrialdi-egoera erlatibo bat egon zen, neurri batean Camorrak kontrolatzen zuena ere, zabortegi eta erraustegien gabezia larriak zituena, eta, gainera, greba ugari egin ziren bilketa-zerbitzuan. 2008. urtearen hasieran, zabortegiak betetzean, bai hiriak eta bai metropolialdeak bilketa zerbitzuaren etena jasan zuten. Irtenbidea, itxitako periferiako zabortegi batzuk berriro irekitzea izan zen baita erraustegien nahitaezko eraikuntza. Auzokideek gogor gaitzetsi zuten zabortegi horiek berriz irekitzea, eta hori gauzatzeko poliziak esku hartu behar izan zuen. Nahi gabeko beste ondorio batzuk hurrengoak izan ziren; alde batetik, kaleetan pilatutako zaborra bereizi gabe erretzea , ondorioz dioxinak isuri zituena eta bestalde, Alemaniara eta Italiako beste eskualde batzuetara zaborra esportatzea garestia izatea.

Arazo guzti hauek hedabideen bitartez zabaldu dira, hiriaren eta orokorrean Italiako hegoaldearen irudi oso negatiboa sortuz. Instituzioek eta pertsona ospetsu batzuek klixearen bidegabekeria azpimarratzen dute, herrialdearen iparraldeko eskualdeetan oso errotuta dagoena eta hiriaren eta bertako biztanleen beste alderdi positibo askoren gainetik nagusitzen dena.

Ikus, gainera

• Napoliko gastronomia

Kanpo estekak

• Napoli hiriko webgune ofiziala (Italieraz)

• Datuak: Q2634
• Multimedia: Naples / Q2634