Ranunculus bulbosus

Ranunculus bulbosus
Irudi gehiago
Sailkapen zientifikoa
Erreinua	Plantae
Ordena	Ranunculales
Familia	Ranunculaceae
Leinua	Ranunculeae
Generoa	Ranunculus
Espeziea	Ranunculus bulbosus Linnaeus, 1753

Ranunculus bulbosus edo urrebotoia Ranunculaceae familiako landare espeziea da. Europa osoan zabaldurik dago.

Urrebotoia sendabelar gisa erabili izan bada ere landare toxikoa da.

Taxonomia

Lineok deskribatu zuen Zientziarako 1753. urtean Species Plantarum liburuan.

Generoaren Ranunculus izenak latinez "igeltxoa" esan nahi du, espezie gehienak leku hezeetan bizi direlako jarri zitzaion. Espeziearen bulbosus izena ere latinetik dator eta "erraboila duena" esan nahi du.

Ranunculus generoko espezie askori esaten zaie urrebotoi, zelaietan ohikoenetakoa R. bulbosus denez, hau ere urrebotoi izenaz ezagutzen da.

Deskribapena

Errizoma laburra du baina loditu egiten da erraboila sortuz. Batzuetan esfera bikoitza izan dezake. Sustraiak finak dira. Erraboil horretatik 5-50 cm arteko zurtoinak ateratzen dira, oso iletsuak. Oinarrian txortendun hosto obatuak ateratzen ditu, goikaldeko hostoak ordea txortengabeak dira eta lamina hiru lobulu lantzeolatu edo linealetan zatikatuta dute.

Loreak kolore hori bizia du, 15-27 mm-ko diametroa du eta hostoaren aurkakoa den pedunkulua du. Sepalo berde iletsuak ditu eta bost petalo, oso obatuak (ia zirkularrak), 7-15 mm-koak. Nektar ezkata nabarmena du.

Fruitua akenio marroi iluna da, kako itxura duen punta duena.

Habitata

Lurzoru buztintsu eta nitrifikatuetan aurkitzen da, sega pasatako zelaietan, bertan behera utzitako soroetan, bide ertzetan, basoetako argiunetan... 3.000 metro arteko altueran ikusten da.

Ugalketa

Landare bizikorra da, hemikriptofitoa. Martxoa eta azaroa artean loratzen da.

Iruditegia

• 
  Landarea.
• 
  Lorea.
• 
  Lorea.
• 
  Erraboila.
• 
  Fruituak.

Kanpo estekak

• Datuak: Q939633
• Multimedia: Ranunculus bulbosus / Q939633
• Espezieak: Ranunculus bulbosus