Edukira joan

Susan Warner

Wikipedia, Entziklopedia askea
Susan Warner

Bizitza
JaiotzaNew York, 1819ko uztailaren 11
Herrialdea Ameriketako Estatu Batuak
Lehen hizkuntzaingelesa
HeriotzaHighland Falls, 1885eko martxoaren 17a (65 urte)
Hobiratze lekuaWest Point Cemetery (en) Itzuli 
Familia
Haurrideak
Hezkuntza
Hizkuntzakingelesa
Jarduerak
Jarduerakidazlea, eleberrigilea eta haur literaturaren idazlea
Lan nabarmenak
Izengoitia(k)Elizabeth Wetherell
Find a Grave: 16218335 Edit the value on Wikidata

Susan Bogert Warner (New York, 1819ko uztailaren 11 – Highland Falls, 1885eko martxoaren 17a), Elizabeth Wetherell izengoitiaz ere ezaguna, estatubatuar idazle presbiterianoa izan zen, erlijioari buruzko fikzioa, haurrentzako liburuak eta lan teologikoak idatzi zituena. The Wide, Wide World eleberriarengatik egin zen ezaguna, batez ere. Gainera, Queechy, The Hills of the Shatemuc, Melbourne House, Daisy, Walks from Eden, House of Israel, What She Could, Opportunities, eta House in Town liburuak idatzi zituen, besteak beste. Anna Bartlett Warner ahizparekin elkarlanean, hainbat eleberri idatzi zituen, arrakasta handia lortu zutenak: Say and Seal, Carl Krinken: His Christmas Stocking, Books of Blessing eta The Law and the Testimony.[1]

Susan Warnerren hilobia.

Bizitza

[aldatu | aldatu iturburu kodea]

Susan Warner New Yorken jaio zen 1819ko uztailaren 11n, eta arbaso puritanoak zituen bi aldeetatik. Aita Henry Warner zuen, New Yorkeko abokatua, jatorriz Ingalaterra Berrikoa, eta ama, berriz, Anna Bartlett, New Yorkeko Hudson Square auzoko familia aberats batekoa. Warner txikia zela, ama hil zitzaion, eta bere aitaren arreba, Fanny, nebaren familiarekin bizitzera etorri zen. Aita aberatsa izan arren, bere diru gehiena galdu zuen 1837ko krisian eta geroagoko auzi eta inbertsio txarretan. Familiak New Yorkeko St. Mark's plazako etxea utzi eta West Pointetik (New York) gertu zegoen Constitution uharteko landetxe zahar batera joan behar izan zuen. 1849an, familiaren egoera ekonomikoan aldaketa gutxi ikusita, Susan eta Anna idazten hasi ziren bizimodua irabazteko.[2][3]

Highland Fallsen hil zen, New York estatuan, eta West Pointeko hilerrian lurperatuta dago.[2][3]

Idazle ibilbidea

[aldatu | aldatu iturburu kodea]

Elizabeth Wetherell izengoitia erabiliz, hogeita hamar eleberri idatzi zituen, eta horietako asko bat baino gehiagotan berrargitaratu ziren. Hala ere, bere lehen eleberria, The Wide, Wide World (1850), izan zen ezagunena. Beste hainbat hizkuntzatara itzuli zen, frantsesera, alemanera eta nederlanderara barne. Osaba Tomen etxolaz gain, estatubatuar egile batek idatzitako liburu zabalduenetako bat izan zen. Beste idazlan batzuk hauek dira: Queechy (1852), The Law and the Testimony (1853), The Hills of the Shatemuc (1856), The Old Helmet (1863) eta Melbourne House (1864). XIX. mendeko kritikari batzuek bere lehen eleberrietako landa-bizitzaren irudikapenak miresten zituzten. Estatu Batuetako kritikariek Warnerren irakaspen kristau eta moralak goraipatu zituzten, eta Londresko kritikariak, berriz, ez ziren hunkitu bere didaktismoarekin. XX. mendearen hasierako kritikoek Warnerren lana «sentimental» eta «balio literariorik gabeko» gisa sailkatu zuten.[2][3] XX. mendearen amaieran, kritikari feministek The Wide, Wide World berraurkitu zuten, etxeko eleberri funtsezko gisa sailkatuz eta genero dinamiken erretratua aztertzean zentratuz.[4]

Lan batzuk bere ahizpa Anna Bartlett Warnerrekin batera idatzi zituen, eleberriak eta haurrentzako kristau abestiak barne. Susanek Jesus Bids Us Shine idatzi zuen, eta Annak, berriz, Jesus Loves Me haurrentzako abesti ezagunaren lehen bertsioa.[2][3]

Lanak

[aldatu | aldatu iturburu kodea]
  • The Wide, Wide World (1850)
  • Queechy (1852)
  • The Law and the Testimony (Anna Bartlett Warnerrekin batera, 1853)
  • Mr. Rutherford's children (Anna Bartlett Warnerrekin batera, 1853)
  • Carl Krinken: His Christmas Stocking (Anna Bartlett Warnerrekin batera, 1854)
  • The Hills of the Shatemuc (bi liburukitan, 1856)
  • Say and Seal (Anna Bartlett Warnerrekin batera, 1860)
  • Melbourne House (1864)
  • The Old Helmet (1864)
  • The Word: Walks Form Eden (1866)
  • What She Could (1871)
  • Opportunities: A Sequel to "What She Could" (1871)
  • The House in Town: A Sequel to "Opportunities" (1871)
  • The Flag Of Truce (1874)
  • Willow Brook (1874)
  • Bread and Oranges (1875)
  • My Desire (1879)
  • The End of A Coil (1880)
  • Nobody (1882)
  • The Letter of Credit (hil ostekoa, 1887)

Erreferentziak

[aldatu | aldatu iturburu kodea]
  1. ↑ (Ingelesez) Rutherford, Mildred Lewis. (1894). American Authors: A Hand-book of American Literature from Early Colonial to Living Writers. Franklin printing and publishing Company, 656-657 or. (kontsulta data: 2025-10-02).
  2. 1 2 3 4 (Ingelesez) Cousin, John William. (1910). «Warner, Susan» A Short Biographical Dictionary of English Literature. London: J. M. Dent & Sons (kontsulta data: 2025-10-02).
  3. 1 2 3 4 (Ingelesez) Gilman, Daniel Coit; Peck, H. T.; Colby, F. M. (1905). «Warner, Susan» New International Encyclopedia. (1. argitaraldia) New York: Dodd, Mead and Company.
  4. ↑ (Ingelesez) «Susan Warner: The Wide, Wide World» Springer: 36-60. (kontsulta data: 2025-10-02).

Kanpo estekak

[aldatu | aldatu iturburu kodea]
"https://eu.wikipedia.org/w/index.php?title=Susan_Warner&oldid=10576502"(e)tik eskuratuta