Txirri, Mirri eta Txiribiton

Wikipedia, Entziklopedia askea
Txirri, Mirri eta Txiribiton
Txirri, Mirri eta Txiribiton 2018an. Ezkerretik eskuinera: Kattalin Ansorena (Mirri), Juanma Zaldua (Txiribiton) eta Peru Ansorena (Txirri).
Datuak
JatorriaDonostia (Gipuzkoa)
Urteak1972ko martxoaren 25a -
gaur egun (52 urte)
Taldekideak
Peru Ansorena
Kattalin Ansorena
Juanma Zaldua
Sariak
Jasotako sariak
Informazio gehigarria
www.txirrimirrietatxiribiton.eus
Facebook: txirrimirrietatxiribiton Twitter: txirrimirritxir Instagram: txirrimirrietatxiribiton Youtube: UC2P8vnd8jbqmkmemRSvr-jw Edit the value on Wikidata

Txirri, Mirri eta Txiribiton euskaraz aritzeko sortu zen lehenengo pailazo taldea da. 1972ko martxoaren 25an eman zuten beraien lehenengo emanaldia Donostian. Berrogeita hamar urtetik gora daramatzate taula gainean eta Euskal Telebistako pailazoak izan dira urte luzez. Oso ezagunak dira Euskal Herrian. Beraien ibilbidean zehar euskal gizartearentzat oso ezagunak bihurtu diren ehundaka abesti sortu dituzte.

Hiru pailazoak xelebreak dira eta bakoitzaren nortasuna ondo definituta dago. Pailazoen eskema klasikoa jarraitzen dute: Txirri azkarra, jakintsua eta dotorea da. Mirri berriz bihurria; inbidiatsua, harroxkoa eta zirikatzailea. Eta Txiribiton pailazo inozoa; ogi pusketa, gozoa, samurra eta adiskide leiala.

Taldekideak[aldatu | aldatu iturburu kodea]

Urtez urteko bilakaera[aldatu | aldatu iturburu kodea]

Pailazo taldeak bilakaera izan du. Gaur egun Txirri, Mirri eta Txiribiton gazteak ezagunak badira ere, urte batzuk lehenago beraien gurasoak hasi ziren pailazo lanetan. Hasiera haietan Kixki, Mixki eta Kaxkamelon izenarekin hasi ziren.

Aktorea 1972-1977 1978-1983 1984-1989 1990-1995 1996-2001 2002-2007 2008-2013 2014-2019 2020-24
Xabier
Otaegi
Kixki Txirri
Jose Ignazio
Ansorena
Mixki Mirri
Andoni
Ezeiza
Kaxkamelon
Txema
Vitoria
Txiribiton
Mikel
Otaegi
Txirri
junior
Kattalin
Ansorena
Mirri
junior
Mirri
Fernando
Ruiz
Txiribiton
junior
Txirri
junior
Txirri
Juanma
Zaldua
Txiribiton
junior
Txiribiton
Peru
Ansorena
Txirri

Taldearen bilakaera[aldatu | aldatu iturburu kodea]

Kixki, Mixki eta Kaxkamelon[aldatu | aldatu iturburu kodea]

Sorrera (1972-1977)[aldatu | aldatu iturburu kodea]

Xabier Otaegi, Jose Ignazio Ansorena eta Andoni Ezeiza Donostiako Parte Zaharreko Kresala elkartean euskara sustatzeko lanetan hasi ziren 1970eko hamarkada hasieran. Jolasak, lehiaketak, antzerkia, txokolatadak... antolatzen zituzten. Behin ordea, 1972an, umeentzat euskarazko ikuskizunik ez zegoela ikusi, eta hutsune hori betetzeko asmoz, pailazo taldea sortu zuten: Kixki, Mixki eta Kaxkamelon.[1]

'Kixki, Mixki eta Kaxkamelon'.

Pailazoak sortzerako garaian, eskema klasikoa erabili zuten: pailazo azkarra (Kixki), lehenengo inozo eta bihurria (Mixki) eta bigarren inozo eta lasaia (Kaxkamelon). Izenak asmatzeko berriz, Donostian haurrek zozketa egiteko erabiltzen zuten abesti batean oinarritu ziren:

Xabier Otaegik egiten zuen Kixkiren pertsonaia, Jose Ignazio Ansorenak Mixkirena eta Andoni Ezeizak Kaxkamelonena. Beraien lehenengo emanaldia 1972ko martxoaren 25ean eman zuten Donostiako Kresala elkartean, 18-19 urte zituztela.

Pako Etxebeste apaizgaiaren laguntzaz hasi ziren haurrak gozarazteko, pailazo lanetan. Pakok lehendik pailazo lanak egiten zituen, gaztelaniaz eta asko lagundu zien hasieran. Gidoi batzuk eman eta ideia ere eskaini zizkien.

1974ko urtarrilean Xabier Otaegi soldaduskara joan zen Afrikako Ceutara eta urtebetez, Pako Etxebestek bete zuen Kixkiren papera. Aurrerago, Xabier bueltatutakoan ere, noizean behin egin izan zituen Mixki eta Kaxkamelonen pertsonaiak laguntza behar zutenean. Xabier 1975eko martxoan itzuli zen soldaduskatik eta gogor segitu zuten berriro lanean. Geroz eta emankizun gehiagotarako deitzen zieten eta urte horretan 30 saio eskaini zituzten Euskal Herri osoan barrena.

1975ean, Herri Gogoa disketxearekin beraien lehenengo diskoa grabatu zuten: Kixki, Mixki ta Kaxkamelon. Argitaratu ordea, aurrerago, 1976an egin zen. Diskoak arrakasta izugarria izan zuen eta orduan egin zuten famatu hain ezaguna den Pintto-pintto abestia.

Urtetik urtera hobetzen (1977-1981)[aldatu | aldatu iturburu kodea]

1977tik 1981era bitarteko martxa antzekoa izan zen. Urtean behin ikuskizuna berritzen zuten, Donostiako Antzoki Zaharrean aurkeztu eta gero herriz herri zabaltzen zuten. Garai honetan, beste pailazoen esketxak imitatzeari utzi eta beraien gidoi propioak asmatzen hasi ziren. Saioak ere ugarituz joaten ziren urtetik urtera.

1982an hamar urte bete zituen pailazo taldeak eta ospatzeko saio berezia eskaini zuten apirilaren 4ean Donostiako Antzoki Zaharrean. Gainera, urte berean, bigarren diskoa kaleratu zuten Trikitraka Trikitron.

Taldearen krisia eta amaiera (1981-1984)[aldatu | aldatu iturburu kodea]

Hurrengo urteetan Xabier Otaegik eta Jose Ignazio Ansorenak Andoni Ezeizarekin zuten harremana hozten joan zen eta 1984ko urtarrilaren 20an beraien azkeneko saioa eman zuten Donostiako Antzoki Zaharrean. Aurerrago, beraen arteko erlazioa okertzen joan eta haserretu egin ziren. Ekainaren 6ko iluntzean, Xabier eta Jose Ignaziok Andoniri esan zioten ez zutela berarekin taldean jarraitu nahi eta honek uztea erabaki zuen.

Kixki, Mixki eta Kaxkamelonek 13 urte eman zituzten Euskal Herri osoan barrena beraien saioak eskaintzen. Lehenengo urte horietan guztietan zentimorik ere kobratu gabe ibili ziren. Saioetako gastuen dirua bakarrik eskatzen zuten, beraientzat irabazirik lortu gabe.

Txirri, Mirri eta Txiribiton[aldatu | aldatu iturburu kodea]

'Don Don Kikilikon'-en, hirukotea. Euskal Telebista.

1983 amaieran Martin Ibarbia ekoizleak Xabier eta Jose Ignaziori deitu zien Euskal Telebistarako lan bana eskatzeko: Xabierri Donostiako haur danborradaren erretransmisioa egitea eta Jose Ignaziori Euskadiko Orkestrak eman behar zuen saio berezia aurkeztea. Bi eskeintzak bete eta ondoren hirugarrena etorri zen: 1984-1985 ikasturtean astero emitituko zen pailazo saio bat egitea haurrentzako. Saioaren iraupena pailazoen eskutan utzi zuten, ordu erdi edo ordubete. Hauek ordu erdi laburregia izango zela eta astero ordubeteko saioa egitea erabaki zuten.

Ordurako Kixki, Mixki eta Kaxkamelonek beraien azken saioa emana zuten eta taldea eraberritu behar izan zuten telebistarako. Izena aldatu eta Txirri, Mirri eta Txiribiton izatera pasa ziren. Xabier Otaegik egiten zuen Txirrirena, Jose Ignazio Ansorenak Mirrirena eta Txiribitonena egiteko berriz, Txema Vitoriari deitu zioten. Txemak aurretik ordezkapen batzuk eginak zituen eta noizbehinka pailazoekin antzeztu izan zuen.

Pailazoen izenak aldatu zituzten, baina pertsonaien izaera ez: pailazo azkarra, inozo bihurria eta mutu bihotz onekoak izaten segitzen zuten. Estetika ordea, aldatu zuten. Jantzi berriak zituzten (Mari Karmen Yuberok egindakoak) eta aurpegiko makilaia ere berriro diseinatu zuten (Karmele Soler eta Amaia Bontigi, Euskal Telebistako makilarien eskutik).

"Don Don Kikilikon" (1984-1988)[aldatu | aldatu iturburu kodea]

Euskal Telebistako programa hark Don Don Kikilikon izena zuen eta lehenengo emisioa 1984ko abenduaren 22an izan zen. Orduan hasi ziren ezagun egiten "puxtarri" hitza puntuak esateko, "Tortolika" hegazkina, "Amona Martxelon"... Lehenengo denboraldian 24 atal grabatu zituzten eta denek egitura berdina zuten: pailazoen agurra eta eszena komikoa, abestia, Debuluzon lehiaketa, Amona Martxelonen ipuinak (Aizpea Goenagak egiten zuen Amona Martxelonena eta Aitona Martxelonena Paco Sagarzazuk); Tortolikaren bidaiak eta amaitzeko beste abestia (zuzeneko orkestra zuten Xabier Lizasok zuzenduta).

Don Don Kikilikon 1987. Euskal Telebista

Don Don Kikilikonen bigarren denboraldian aldaketa nabarmenak izan ziren, 1985-1986 ikasturtean. Txanda honetan beste 40 atal egin zituzten eta gero udan, denboraldian zehar egindako fizkziozko esketxak elkartuta beste 5 saio berezi. Garai honetan gidoilari bat hartu zuten: Andoni Egaña. Ordura arte Xabier eta Jose Ignazio ziren gidoiaz arduratzen zienak. Gainera, Jaime Otamendi ere lantaldera batu zen koordinatzaile lanetan eta dekoratu berria egin zuten. Garai honetan hasi ziren chroma key teknika ere erabiltzen.

Bigarren denboraldia amaitzeko, 1986ko uztailaren 4ean, Euskal Telebistaren historiako lehenengo zuzeneko emankizuna egin zuten. Zarauzko kiroldegitik zuzenean emititu zuten 3.000 haurren aurrean.

Hirugarren denboraldian, 1986-1987an, beste 39 atal grabatu zituzten (udan esketxekin eta momenturik onenekin osatutako beste 12). Denboraldi honetan 100. atalera iritsi ziren. Esketx gehiago egiten hasi ziren eta Eneko Olasagasti eta Carlos Zabala gidoilari lanetan hasi ziren. Gainera, Debuluzon lehiaketak tamaina handiagoa hartu zuen eta proba berriak egin zituzten. Denboraldi honetan saio bereziak ere egin zituzten: jubilatuekin, adimen urrituekin eta zuzeneko bi emanaldi Bilbotik eta Gasteizetik.

Laugarren denboraldia izan zen Don Don Kikilikonen azkena. Azken honetan 38 atal egin zituzten eta berrikuntzen nagusietako bat aurkezle berria izan zen. Jaime Otamendi kameren atzean koordinatzaile lanetan zebilen, baina denboraldi honetan aurkezle izatera pasatu zen. Hau izan zen bere kameren aurreko lehenengo lan potoloa.

'Pantera beltza'. 1988-89.

Berriro herriz herri (1986-1998)[aldatu | aldatu iturburu kodea]

Lau urtez aritu ziren saioa egiten, 1984tik 1988ra arte. Telebistak lan asko eskatzen zuen eta lehenengo urteetan herriz herri ibiltzeari utzi zioten. Hala ere, 1986an, telebistako lana eta antzerkikoa uztartu eta berriro herrietara joaten hasi ziren, garai batean egin zuten bezalaxe. Hauek izan ziren hurrengo urteetako antzezlanak:

  • Sorginaren kobazuloan (1986)
  • Galtza lapurra (1987)

Hurrengo ikasturtean, 25. urteurrena bete zuten eta ospatzeko, beraien saiorik kuttunena errepikatu zuten:

Aurrerago berriz:

"Funtzioa" (1989-1991)[aldatu | aldatu iturburu kodea]

Sakontzeko, irakurri: «Funtzioa (ETB1)»

Lau urtez Don Don Kikilikon egin eman ondoren, nekatuta zeuden pailazoak eta telebista mundua uztea erabaki zuten. Orduan azkeneko saioaren grabaketaren ondoren, agur modura show bat egin zuten Miramongo bulegoetan. Ikuskizun hura Mikel Lejarzak ikusi eta Euskal Telebistarako helduentzako saio bat egiteko eskatu zien Xabier Otaegiri eta Jose Ignazio Ansorenari. Behin baino gehiagotan esan zuten ezetz, baina azkenean, horrenbeste aldiz eskatu eta gero onartu egin zuten eskaria. Orduan Funtzioa sortu zuten, Xabier eta Piterren show-a. Ostiral iluntzetan, zuzenean ematen zen helduen umore saioa.

Arrakasta handia izan zuten eta hiru denboraldi egin zituzten (1989ko ekainetik otsailera, 1989-1990 denboraldia eta 1990-1991 denboraldia). Guztira 141 saio. Programa honetako hiru ataletan (Eguberrietako berezi batean, pailazoei eskainitako berezi batean eta haurrei eskainitako berezi batean) Txirri, Mirri eta Txiribiton ere agertu ziren.

Jaialdi handiak (1990-1998)[aldatu | aldatu iturburu kodea]

Herriz herriko antzezlan batean, Txiribiton eta Mirri.

Funtzioa burutzeko enpresa bat sortu zuten: Ikuskin S.L. Bertan sartu zuten IZ disketxeko Fernando San Jose ere. Hurrengo urteetan enpresak hark antolatu zituen Txirri, Mirri eta Txiribitonen proiektu guztiak. Enpresarekin egitura handiko jaialdiak antolatzeko erraztasuna hartu zuten eta hainbat egin zituzten hurrengo urteetan. Garrantzitsuenetakoak bi.

  • Gasteizko Araba Arenan (gaur egun Buesa Arena deitua) 1997ko abenduaren 18an egin zutena: egun bakar batean, goiz eta arratsaldeko funtzioetan, 8.000 haur baino gehiagoren aurrean aurkeztu zuten saioa.

"Txirri, Mirri eta Txiribiton" saioa (1993-1994)[aldatu | aldatu iturburu kodea]

1993an berriro ere ETB 1era itzuli ziren pailazoak. Txirri, Mirri eta Txiribiton izeneko saioa egin zuten. Programa hau bi etapatan banatu zen. 1993an ordu eta erdiko 13 saio egin zituzten (tartean marrazki bizidunekin). Gero 1994an berriro itzuli ziren zirko itxurako plato berri batekin. Oraingo honetan ordubeteko 24 atal grabatu zituzten eta gero, denboraldiko momenturik onenen beste 11 bilduma. Hauetan ere beti egitura berdina zen: Agurra, abestia eta esketxa; Kinkirrinera izeneko atala (haurrek kantatzeko); Jolasean ze arraio! (jolasteko); Allakuidaos atala (eztabaidarako); abestia; pasadizoak eta Azkenputz.

Atal hauetan, behin baino gehiagotan, Xabierren eta Piterren seme-alabek (Mikel Otaegi, Patrizia Ansorena, Kattalin Ansorena eta Peru Ansorena) pailazoen haurtzaroko irudiak antzeztu izan zituzten. Pailazo diskoaren azalean, esaterako, Mikel, Kattalin eta Patrizia ageri dira (hamar urte geroago, 2003an, hauek izan ziren Txirri, Mirri eta Txiribiton juniorren paperak egin zituztenak eta gaur egungo pailazo ofizialak).

'Barre Busa' (2000) Euskal Telebista.

"Barre busa" (2000-2001)[aldatu | aldatu iturburu kodea]

Milurtekoa amaitzeko Barre busa telebista saioari ekin zioten pailazoek (2000 eta 2001 artean). 1999an egin zituzten lehen grabaketak eta 2000ko urtarrilaren 7an estreinatu zen ETB 1en. Ixiar Oreja zen aurkezlea. Ondorengo urteetan pailazoen telebistako etsai izango zen Kakusai, lehen aldiz, garai hartan agertu zen.

Telebistan lan egitea eta herriz herri ibiltzea ez ziren bateragarriak eta beraz, saioan berrikuntza bat sartzea erabaki zuten. Barre busa telebistako estudio batean grabatu beharrean, herrietako antzokietan egin zuten. Horrela, telebistako saioa grabatzeaz gain, Euskal Herria zeharkatzen zuten herriz herri. Programa asteroko ematen zuten eta ordubeteko iraupena zuen.

Horrela jarraitu zuten, telebistako saioak egiten herriz herri, hurrengo urteetan ere. Barre busa, Altza porru! eta Trikitraka Trikitron saioetan.

'Altza Porru' (2002) Euskal Telebista.

"Altza, Porru!" (2002)[aldatu | aldatu iturburu kodea]

2001-2002 ikusturtean izan zen Txirri, Mirri eta Txiribitonen 30. urteurrena.

Ikasturte horretan, Barre busa utzi eta Altza, Porru! saioa egin zuten telebistan. Grabaketak 2001 amaieran hasi bazituzten ere, 2002ko urtarrilean hasi ziren emititzen ETB 1en. Hau ere asterokoa eta ordubeteko iraupenarekin.

Altza porru! izeneko diskoa ere kaleratu zuten.

"Trikitraka Trikitron" + Juniorrak (2003-2010)[aldatu | aldatu iturburu kodea]

'Trikitraka Trikitron' (2003) Euskal Telebista.

2002 amaieran Trikitraka Trikitron grabatzeari ekin zioten. Telebistan ordea 2003ko urtarrilean hasi ziren ematen. Altza porru!ren estilo beretsuarekin segitu zuten, baina izena aldatuta. Herriz herri joaten ziren astero-astero Pelipe izeneko trenean. Saioak ordubete irauten zuen. Urtero aldaketa txikiak sartu zituzten, hobetzen jarraitzeko asmoarekin.

Programa egiteko pertsonaia askoren laguntza izan zuten: Moro katua, Kakusai, Kakusina, Graxiana sorgina, Juanita detektibea, Elvi sabeliztuna, Txan magoa, Marsel magoa, Maitane, Pepitto eta Matixa.

2003ko abenduaren 20an ekin zioten bigarren denboraldiari eta atal horretan lehenengo aldiz Txirri, Mirri eta Txiribiton junior ezagutu genituen. Lehenengo aldi hartan pailazoen papera Fernando Ruiz (Txirri), Belén Cruz (Mirri) eta Josean Bengoetxea (Txiribiton) aktoreek egin zuten.

2003-2004 denboraldian Txirri, Mirri eta Txiribiton junior izeneko pailazo gazteen taldea martxan jarri zen. Mikel Otaegi (Xabierren semea) zen Txirri, Kattalin Ansorena (Jose Ignazioren alaba) Mirri eta Fernando Ruiz aktorea zen Txiribiton. Herriz herri kuskizunak eskaintzen hasi ziren eta noizean behin Euskal Telebistako Trikitraka Trikitron saioan ere agertzen ziren.

2005ean, Pailazokeriak marrazki bizidunetako filma estreinatu zen zinema aretoetan.

'Sagarra da apple' (2011) Euskal Telebista.

"Sagarra da apple" (2011)[aldatu | aldatu iturburu kodea]

Trikitraka Trikitron amaitutakoan, 2011ean, ekin zioten euren telebistako azken proiektuari: Sagarra da Apple.

Saio hau ezberdina zen aurrekoekin alderatuta. Bertan haurrak entretenitzeaz gain, ingelesa ikastea zen helburua. Saioa egunero emititzen zen eta 10 minutuko iraupena izaten zuen.

Belaunaldi aldaketa (2012-2013)[aldatu | aldatu iturburu kodea]

2012 urtean, Txirri, Mirri eta Txiribitonek 40 urte bere zituzten 1972an sortu zirenetik.

Data berezi hori ospatzeko, pailazo zahar eta gazteek, Euskadiko Orkestra Sinfonikoarekin, 40 urteko algara izeneko emankizuna estreinatu zuten. Bi belaunaldiek batera egindako ikuskizun honekin bira bat egin zuten Euskal Herriko hiru hiriburuetan eta arrakasta handia lortu zuten.

2012-2013 urteetako Gabonetan aktore helduenek erretiroa hartzea erabaki zuten. Horretarako, Agur barrez ikuskizuna sortu eta 30 bat saio eman zituzten Euskal Herrian zehar. Ikuskizun honetan ere pailazo zaharrak eta gazteak batera aritu ziren, erreleboa ematen zietela eta euskal barrea pizturik mantentzeko lekukoa pasatzen zietela adierazteko.

Txirri, Mirri eta Txiribiton zaharren azkeneko saioa 2013ko urtarrilaren 6an izan zen Igorren.

Txirri, Mirri eta Txiribiton gazteak[aldatu | aldatu iturburu kodea]

Txirri, Mirri eta Txiribiton gazteak.

Gazteen jarraipena (2013-2021)[aldatu | aldatu iturburu kodea]

Txirri, Mirri eta Txiribiton erretiratu zirenean, juniorrek hartu zuten beraien lekukoa. Orain junior izena kendu eta beraiek bihurtu dira Txirri, Mirri eta Txiribiton ofizial eta bakarrak.

Sortu zirenetik zortzi ikuskizun jarri dituzte martxan:

50. urteurrena + Beteranoen itzulera (2021-2024)[aldatu | aldatu iturburu kodea]

2022. urtean Txirri, Mirri eta Txiribitonek 50 urte bete zituzten eta Euskal Telebistak 40. Horregatik, bi urteurrenak ospatzeko, 2021eko abenduaren 31n pailazo beteranoak berriro elkartu ziren Biba zuek! saioak antolatu zuen Biba 2022 gala berezian. Ia bederatzi urte pasa ziren erretiratu eta azkenekoz pailazoz jantzi zirenetik.

2024ko martxoaren 25ean 52 urte bete zituzten pailazoek.

Bitxikeriak[aldatu | aldatu iturburu kodea]

  • 1975ean, saioetarako bidaietan polizien kontroletan sarri zituzten arazoak errazago gainditzeko asmoz, pailazo profesionalen baimena ere atera zuten. Donostiako La Perla diskotekan egin zuten azterketa, garai hartan beharrezko baitzen Sindikatu Bertikaleko profesional txartela.
  • Musikari garrantzia handia ematen zioten eta beraien saioetara saxofoia, bonbardinoa eta teklatu txiki bat eramaten hasi ziren. Bonbardinoa erosteko 100.000 pezetako kreditua eskatu behar izan zuten 1979an.
  • Pailazoei hiru aldiz lehergailuak jarri zizkien poliziak. Lehenengo bietan ez zen txikizio handiegirik izan, baina bai hirugarrenean. Pailazoak ibili ziren hondakinak garbitzen.
  • Beraien ibilbide luzeko porrot bakarra 1983an izan zuten, Pasai Antxon, Gipuzkoan. San Ferminetan, zezen plaza mugikorra jarri zuten eta zezenen aurretik Kixki, Mixki eta Kaxkamelonek beraien ikuskizuna eman behar zuten. Taulara atera zirenean ordea, bertan haurrik ez zegoela eta gehienak helduak eta mozkorrak zirela ikusi zuten. Saioa hasi zuten eta esketx batean, Kaxkamelon eszenatokitik atera zenean, ikusle batek besotik heldu eta esan zion: ¡A ver cuándo acabáis, hijoputas!. Hura izan da amaitu gabe utzi duten saio bakarra.
  • Don Don Kikilikon saioa irailean emititzen hastekoak ziren. Baina ETB oraindik sorrera fasean zegoen eta dena antolatzeko zegoen. Azkenean, data atzeratu eta lehenengo atala 1984ko abenduaren 22an eman zuten eta bigarrena abenduaren 29an.
  • Don Don Kikilikoneko Hirugarren kapitulua 1985eko urtarrilaren 5ean, errege bezperan ematekoak ziren, baina ETBko langileek greba egin zuten eta grabatuta zegoen atal hori, ez zen inoiz emititu (saio horretan, ETBko zuzendaria zen Luis Alberto Aranberri 'Amatiño' agertzen zen).

Telebistako saioak[aldatu | aldatu iturburu kodea]

Denboraldia Denboraldiak Atalak Emisio hasiera Emisio amaiera Audientzia (bataz bestekoa)
Ikusleak Kuota (eusk.)
Don Don Kikilikon 1 24 141 + 17 1984ko abenduaren 22a 1985eko ekainaren 22a
2 40 + 5 1985eko urriaren 6a 1986ko uztailaren 4a
3 39 + 12 1986ko urriaren 5a 1987ko ekainaren 28a
4 38 1987ko urriaren 18a 1988ko uztailaren 3a
Txirri, Mirri eta Txiribiton 1 13 37 + 11 1993 1993
2 24 + 11 1994 1994
Barre busa 1 26 52 2000ko urtarrilaren 7a 2000ko uztailaren 14a
2 26 2000ko abenduaren 23a 2001eko ekainaren 23a
Altza, Porru! 1 26 26 2002ko urtarrila 2002
Trikitraka Trikitron 1 26 194 2003ko urtarrila 2003ko ekainaren 28a
2 25 2003ko abenduaren 20a 2004ko ekaina
3 27 2004ko abenduaren 25a 2005eko ekaina
4 25 2006ko urtarrilaren 14a 2006
5 25 2007ko urtarrilaren 13a 2007
6 26 2008ko urtarrilaren 19a 2008
7 20 2009 2009
8 20 2010eko otsailaren 6a 2010eko uztaila
Sagarra da apple 1 104 104 2011ko otsailaren 7a 2011ko uztailaren 14a
Guztira 18 554 + 28 (refritoak) 1984ko abenduaren 22a 2011ko uztailaren 14a

Beste produktuak[aldatu | aldatu iturburu kodea]

Diskoak[aldatu | aldatu iturburu kodea]

Zenb. Urtea Diskoa Argitaletxea
1 1976 Kixki ta Mixki ta Kaxkamelon Herri Gogoa
2 1982 Trikitraka Trikitron IZ
3 1985 Tortolika IZ
4 1986 Ormatxulo IZ
5 1987 Zirt-Zart IZ
6 1988 Xelebrekeriak IZ
7 1990 Eguberri on! IZ
8 1991 Atzo ttun ttun IZ
9 1992 Kinkirrinera IZ
10 1993 Jolasean, ze arraio! IZ
11 1994 Allakuidaos IZ
12 1995 Pailazo IZ
13 1996 Gure abestiak IZ
14 1998 Barre egin IZ
15 1998 Han Urruñan etxe pospola IZ
16 1999 Txirri, Mirri, Txiribiton eta Euskadiko Orkestra Sinfonikoa IZ
17 2001 Altza Porru! Elkar
18 2004 Altza Pelipe Elkar
19 2007 Sudur gorria Elkar
20 2009 Petiri danbolin Puxtarri
21 2009 Txutxupe Expressive Betizu
22 2011 Poxpoliña haurtxo denok elkarturik Puxtarri



Filmografia[aldatu | aldatu iturburu kodea]

Zenb. Urtea Ikuskizuna Ekoizlea
1 1991 Patxistein doktorea Ikuskin (IK-105)
2 1992 Melokotonio eta olinpiadak Ikuskin (IK-106)
3 1994 Allakuidaos Ikuskin (IK-100)
4 1994 Klikla telebista Ikuskin (IK-101)
5 1996 Xaguxarroski kontea Ikuskin (IK-103)
6 1997 Pantera beltza Ikuskin (IK-104)
7 1998 Barre egin Ikuskin (IK-107)
8 2002 Altza porru! EiTB
9 2003 Trikitraka Trikitron 1 EiTB
10 2004 Trikitraka Trikitron 2 EiTB
11 2004 Trikitraka Trikitron 3 EiTB
12 2005 Trikitraka Trikitron 4 EiTB
13 2005 Trikitraka Trikitron 5 EiTB
14 2006 Trikitraka Trikitron 6 EiTB
15 2006 Trikitraka Trikitron 7 EiTB
16 2006 Trikitraka Trikitron 8 EiTB
17 2006 Trikitraka Trikitron 9 EiTB
18 2006 Pailazokeriak (Filma) Elkar
19 2007 Trikitraka Trikitron 10 EiTB
20 2007 Trikitraka Trikitron 11 EiTB
21 2007 Trikitraka Trikitron 12 EiTB
22 2007 Trikitraka Trikitron 13 EiTB
23 2008 Trikitraka Trikitron 14 EiTB
24 2008 Trikitraka Trikitron 15 EiTB
25 2008 Trikitraka Trikitron 16 EiTB
26 2008 Triki-oke: Pailazoen karaokea EiTB
27 2009 Trikitraka Trikitron 17 EiTB
28 2009 Trikitraka Trikitron 18 EiTB
29 2015 Terapia Txirri, Mirri eta Txiribiton
30 2016 Txutxupe Txirri, Mirri eta Txiribiton
31 2018 Patxistein doktorea Txirri, Mirri eta Txiribiton

Papereko argitalpenak[aldatu | aldatu iturburu kodea]

Zenb. Urtea Izenburua Estiloa Argitaletxea
1 1984 Barrezka Txiste bilduma Gordailu
2 1986 Ipurbeltz (105, 106, 107, 108, 109. aleak) Komikia Ipurbeltz
3 1987 Txirri, Mirri eta Txiribiton Afrikan Liburua Kea
4 1987 Txirri, Mirri eta Txiribiton sendagilearen etxean Liburua Kea
5 1987 Txirri, Mirri eta Txiribiton ilargian Liburua Kea
6 1992 Txirri, Mirri eta Txiribiton oporretan Liburua Elkar
7 1992 Txirri, Mirri eta Txiribiton Afrikan Liburua Elkar
8 1994 Txirri, Mirri eta Txiribiton herriko festetan Liburua Elkar
9 1994 Txirri, Mirri eta Txiribiton igeltsero Liburua Elkar
10 1994 Txirri, Mirri eta Txiribiton eskolan Liburua Elkar
11 1997 Zubiko zirkoa Komikia Ibaizabal
12 1998 Sir Endikaren eskopeta Komikia Ibaizabal
13 2000 Alima polita Liburua Alberdania
14 2000 Mendian Liburua Alberdania
15 2008 Irakurri eta margotu gure pailazoekin Margotzeko + Liburua Ttarttalo
16 2008 Zuri zorionak Ipuina Ttarttalo
17 2008 Jolasean, ze arraio! Ipuina Ttarttalo
18 2008 Pintto. Txirri, Mirri era Txiribitonekin Ipuina Ttarttalo
19 2008 Pintto. Txakur guztiak Ipuina Ttarttalo
20 2011 Txirri, Mirri eta Txiribiton Olentzeroren laguntzaile Ipuina EiTB
21 2011 Hiru txerritxoak eta Txirri, Mirri eta Txiribiton Ipuina EiTB
22 2011 Txanogorritxo eta Txirri, Mirri eta Txiribiton Ipuina EiTB
23 2012 Hamelingo txirularia eta Txirri, Mirri eta Txiribiton Ipuina EiTB
24 2012 Txirri, Mirri eta Txiribiton, Aladino eta kriseilu magikoa Ipuina EiTB

Bestelako produktuak[aldatu | aldatu iturburu kodea]

Zenb. Urtea Izenburua Estiloa Argitaletxea
1 1989 Funtzioa Binilo IZ
2 1998 Gurekin hegan CD-ROM (Jolasa) Elkar
3 2003 Muu... sutsuak! 1 CD EiTB
4 2004 Muu... sutsuak! 2 CD EiTB
5 2004 Muu... sutsuak! DVD EiTB
6 2004 Txirri, Mirri eta Txiribiton Junior DVD Puxtarri
7 2005 Margotu zure pailazoak 1 Margotzeko Ttarttalo
8 2005 Margotu zure pailazoak 2 Margotzeko Ttarttalo
9 2005 Margotu gure pailazokeriak 1 Margotzeko Ttarttalo
10 2005 Margotu gure pailazokeriak 2 Margotzeko Ttarttalo
11 2005 Gure pailazoen puzzleak 1 Puzzlea Ttarttalo
12 2005 Gure pailazoen puzzleak 2 Puzzlea Ttarttalo
13 2008 Gure pailazoen puzzleak 3 Puzzlea Ttarttalo
14 2008 Pinttoren puzzleak Puzzlea Ttarttalo
15 2008 Pintto uretara Margotzeko Ttarttalo

Sariak[aldatu | aldatu iturburu kodea]

Erreferentziak[aldatu | aldatu iturburu kodea]

Kanpo estekak[aldatu | aldatu iturburu kodea]