Vladimir Zworikin
Vladimir Kosma Zworikin (Murom, Errusiar Inperioa, 1888ko uztailaren 29a - New York, Ameriketako Estatu Batuak, 1982ko uztailaren 29a) asmatzailea, ingeniaria eta telebistaren teknologiako aitzindaria izan zen. Errusiarra jatorriz, estatubatuar hiritartasuna hartu zuen.
San Petersburgoko Teknologia Institutuan egin zituen ikasketak. Han, Boris Rosingen laguntzaile izan zen, telebista elektronikoa egiteko saioetan (1910). Parisen, Collège de Francen aritu zen gero, X izpiak ikertzen, Paul Langevinen gidaritzapean. 1919an Estatu Batuetara joan zen. Pittsburgheko Unibertsitatean eta Brooklyngo Institutu Politeknikoan aritu zen lanean, eta 1924an hango herritartasuna hartu zuen. Radio Corporation of America erakundean sartu zen (1924), eta ikerketarako zuzendari izatera iritsi zen. Besteak beste, ikonoskopioa asmatu zuen (1928), eta optika elektronikoaren eremuan ere hainbat lan egin zuen.
Erreferentziak
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.