Yuan Shikai
Yuan Shikai (Xiangcheng, 1859ko irailaren 16a - Pekin, 1916ko ekainaren 6a) txinatar politikari eta militarra izan zen. Gorteko goi-mailako funtzionarioa zen. Lehen ministro eta gudarosteko buruzagi nagusi izan zen. Cixi emakume enperadorearen garaian, Kanpo Arazoetako ministro eta Kontseilu Nagusiko lehendakari izendatu zuten, baina hura hil zenean, haren ondorengoek karguak kendu eta gobernutik baztertu zuten. Gero, ordea, berriz deitu zioten, eta azkenik, Txinan bakea ezarri eta lurraldea bateratzeko gaitasuna zuen bakarra bera zelakoan, Txinako lehendakari izateko proposatu zuten, bai enperadoreak bai lehen ministroak, eta, hala, lehendakari izendatu zuten (1912-1916). Parlamentua desegin eta diktadura ezarri zuen. Bere burua enperadore izendatu nahi izan zuen, baina asmo hori zela eta, matxinada bat antolatu zen hegoaldean, Gerra Zibila sorraraziz, azkenik, Li Yuanhong aginpidera eraman zuena.
Erreferentziak
 |
Wikimedia Commonsen badira fitxategi gehiago, gai hau dutenak: Yuan Shikai  |
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.