Donostiako Zurriola zubia

Zubia errepide eta trenbideen gainetik, edota ibai, haran edo bestelako oztopo geografikoen gainetik igarotzeko eraikuntza da. Hainbat materialez eginak izan daitezke (zurez, metalez edo hormigoiz), eta forma eta tamaina desberdinak izan ditzakete.

Zubi motak

Zubi habeduna

Zubi habeduna

Zubi habeduna zubi motarik zaharrena, arruntena eta ohikoena da. Zubi habedun bat egitura horizontal bat da, espazio huts baten gainetik lotu behar dituen bi aldeak elkartzen dituena. Oro har, zubi habedunek bi alde horiek hartzen dituzte euskarri gisa, baina, tarteko espazio hutsa oso zabala bada, bi aldeen artean zutabe gehiago egoten dira zubiari eusteko.

Zubi habedun oso sinplea da, adibidez, errekatxo baten alde batetik bestera pasatzeko jarrita dagoen enbor edo ohola. Gaur egungo zubi habedunak altzairuzko habeekin egiten dituzte normalean. Errepideetako zubi gehienak zubi habedunak dira.

Zubi saretaduna

Zubi saretaduna

Zubi habedunen antzera, zubi saretadunek ere euskarri bat dute alde bakoitzean. Bi aldeen arteko zutabeak ere izan ditzakete euskarri gisa. Haien egiturei esker, ordea, zubi habedun soilak baino iraunkorragoak dira. Metalezko edo zurezko barraz eginiko egitura batek lotzen ditu zubiaren bi aldeak. Barra hauek triangelu-formak osatuz daude lotuta bata besteari. Sarritan, tunelak diruditen egiturak osatzen dituzte galtzadaren gainean.

Zubi mentsuladuna

Zubi mentsuladuna

Zubi mota hau mentsula eta hegal izeneko egiturez dago osatua. Hegal bat alde bakar batean malguki bat duen habe bat da, tranpolin bat bezala. Barra asko dituen egitura batek iraunkortasun handiagoa ematen dio habeari, zubi saretadun batean bezala. Horrelako gutxienez bi habe luzatzen dira bata bestearengana, zubi mentsuladun bat osatuz.

Zubi arkuduna

Zubi arkuduna

Zubi habedunen antzera, aspalditik eraiki izan dira zubi arkudunak. Arku formako egitura batek eusten dio azpitik zubiari. Erreka eta haranetan erabiltzen dira normalean zubi arkudunak.

Zubi esekia

Zubi esekia

Zubi esekien kasuan, kable batzuek eusten diote galtzadari. Kable nagusiak bi dorre edo gehiagori egoten dira lotuta. Kable nagusi kurbatu horietatik kable txikiago batzuk egoten dira zintzilik, eta kable txiki horiek eusten diote zubiari. Zubi esekiek beste edozein zubi moderno baino tarte luzeagoak lotu ditzakete.

Tirante-zubia

Tirante-zubia

Tirante-zubiek ere kableak erabiltzen dituzte euskarri gisa. Haien kableek zuzenean lotzen dituzte dorreak eta galtzada. Lerro zuzen eta diagonalak osatuz eusten diote galtzadari.

Zubi mota gehiago

Zubi batzuk mugitu egiten dira. Batzuk goruntz irekitzen dira, itsasontzi handiak alde batetik bestera pasatzen uzteko. Beste batzuk biratu egiten dira aldeetara. Beste batzuek, pontoi izenekoek, flotatu egiten dute ur gainean.

Eskema

• 
  Zubi arkudun baten eskema