Ikuskizungintza

Ikuskizungintza edo Show business irabazteko asmoz sortutako lantegiak eta erakunde-multzoa dira. Ekimen ekonomiko hauetan kultura ere egon dago, baina etekinak lortzea eta kontsumoa dira helburu nagusiak. Gaur egun zabalkunde handia izaten ari den esparrua da.

Aisia eta entretenimendua[aldatu | aldatu iturburu kodea]

Aisia eta entretenimendu kontzeptuak askotan nahastu egiten dira baina desberdindu behar dira. Aisia lanetik eta bizitzaren funtsezko ekintzetatik at dauden ekintzak dira eta hor barruan ere entretenimendu aktibitateak kokatuko lirateke: entretenimendua, modu batez, aisia barruan aztertuko da, aisia-denbora erabiltzeko modu bat izanik, baina ikuskizun eta negozio osagaiak ditu. Adibidez, hondartzan bainatzea aisia da; akuapark batera joatea, entretenimendua; azken honetan, finean, negozioa dago antolatuta eta helburu nagusia hara joaten direnak ahalik eta diru gehiago gastatzea da. Neurri handia batean negozio mota honen zabaltze prozesua kontsumo-gizartearen ondorioa da.