Txikipedia:Nabarmendutako artikulua/2023/05
Erregai fosilak energia-iturri bat dira, petrolioa, ikatza eta gas naturala batez ere; fosil deitzen zaie, gai horiek aspaldi bizi izan ziren izaki batzuen hondakinak direlako, fosilen antzera.
Erregai fosilak eta haietatik ateratako produktuak gauza askotarako erabiltzen dira: elektrizitatea sortzeko, autoen eta bestelako ibilgailuen gasolina egiteko, etxeak berotzeko, plastikoak egiteko, etab.
Herri askok ekoizten dituzte erregai fosilak. Petrolio-ekoizlerik handiena Saudi Arabia da. Errusia munduko gas-erreserbarik handiena duen herrialdea da; eta ikatz-ekoizlerik handienak, berriz, Ameriketako Estatu Batuak (AEB) eta Txina dira. AEB dira erregai fosilak gehien kontsumitzen dituen herrialdea, bestalde.
Nola sortuak dira?[aldatu | aldatu iturburu kodea]
Erregai fosilak duela milioika urte sortu ziren Lurrean; batez ere, duela milioika urte bizi izandako landareen, algen eta beste organismo batzuen ustelketatik sortutakoak dira, eta horregatik jatorri organikoa dutela esaten da. Organismo horiek lokatzarekin eta lurrarekin nahasi ziren eta, kasu batzuetan, solido bihurtu ziren, ikatza sortuz; beste kasu batzuetan, egoera likido baino oso trinkoan daude, petrolioa kasu; edota ustelketatik ateratako gasak dira (metanoa eta beste gas batzuk).