Txikipedia:Testu-antolagailu

Testu-antolagailu edo testu-antolatzaileak testu barneko elementuak eta ideiak antolatzen dituzten hitzak edo hitz multzoak dira.
Haietako batzuek, ideiak, esaldiak edo esaldi multzoak lotzen dituzte (Ez nuen uste, baina zuk irabazi duzu).
Beste batzuek, berriz, testuaren zati jakin batean, ondoren zer datorren iragartzeko ere balio dute, ondoren datorren hori nola ulertu behar dugun iragartzeko. Horretarako, esaldiaren aurreko zatian doaz (Nahiz eta esaten duzuna erabat zuzena ez izan, arrazoia emango dizut).
Azkenik, tarteki moduan ere erabil daitezke, koma artean idatziz (Batzuk onak dira, besteak, berriz, ez).
Ahoz zein idatziz erabil daitezke eta koherentzia ematen diote testuari.

Mota askotako testu-antolagailuak daude, testuko ideiak antolatzeko orduan betetzen duten funtzioaren arabera:

• Denbora-harremana adierazten dutenak: testuko perpaus edo ideiak denboraren arabera antolatzen dituzte. Honelakoak dira, adibidez: lehenik, ondoren, azkenik, gero, bitartean...
• Espazioa adierazten dutenak. Hauek lekutasuna adierazten dute, ideien zein gauzen lekutasuna: goian, ondoan, atzeko aldean, han, hemen, hor, haratago, barruan, alde batetik, bestetik, eskuinean, ezkerrean, etab.
• Idein arteko kontrastea edo kontrako ideiak adierazten dituztenak: baina, aitzitik, haatik, aldiz, bestalde, baina, baizik (eta), berriz, benetan, hala ere, honen aurka, izan ere, etab.
• Ideien arteko kausak edo ondorioak adierazten dutenak: beraz, bait-, hortaz, horregatik, -(e)la bide, -(e)la kausa, -(e)la medio, -(t)zeagatik, etab.
• Bestelako funtzioak betetzen dituztenak:

- Bukaera adierazten dutenak: laburbilduz, amaitzeko, azkenik.

- Adibideak edo argibideak adierazten dituztenak: adibidez, esaterako, bestela esanda.

Testu-antolagailuen adibideen sailkapena

Hasteko	Ordenatzeko	Ideia aurkezteko	Jarraitzeko	Kontrakotasuna	Iritziak emateko	Adibideak jartzeko	Arrazoitzeko	Esana indartzeko	Ziurtasuna adierazteko	Bukatzeko eta ondorioztatzeko	Ideia berriak sartzeko
Hasteko	Batetik	Hori dela eta	Horren ondorioz	Baina	Nire iritziz	Adibidez	Horregatik	Esan bezala	Zalantzarik gabe	Amaitzeko	Ez hori bakarrik
Lehenik eta behin	Bestetik	Oro har	Horren haritik	Dena dela/Dena den	Nire ustez	Esate baterako	Izan ere	Aipatu dugunez	Ziurrenik	Ondorioz	Bestalde
Ezer baino lehen	Era berean	Horri dagokionez	Hari beretik	Hala ere	Diotenez	Alegia	Beraz	Berriro esanda	Zer esanik ez	Laburbilduz	Baita ... ere
Lehen-lehenik	Halaber	Horri gagozkiolarik	Bigarrenik	Edonola ere	Antza denez	Hau da	Hortaz	Hobe esanda	Seguruenik	Hitz gutxitan esanda	Horrez gain
Gauzak horrela	Zentzu berean	Hori denaz bezainbatean	Gero	Nolanahi ere	Badirudi	Kasurako	Hori dela bide	Are gehiago	Argi dago	Horrenbestez	Hori ez ezik
Honetaz ari naizela	Bestalde		Horren ostean	Ordea	Dakigunez	Konparazio baterako	Gauzak horrela	Gainera	Dudarik ez	Amaitzeko, esan dezagun	Baina, bestetik