AMIA analisi

Amia (aukera, mehatxu, indargune eta ahulezia hitzez osatutako akronimoa, gazteleraz DAFO eta inglesez SWOT bezala ezagutua)matrizeari esker enpresak bere benetako egoera ezagutzeaz gain, antzemandako aukerak aprobetxatzeko abian jarri beharreko ekintzak planteatzen eta taldea mehatxuen aurrean prestatzen lagunduko du.

Azterketaren helburu nagusia enpresari bere sendotasun eta ahuleziei buruzko informazioaren erdiespenean laguntzea da, behin hauek ezagututa indarruneak sendotuaz, ahuletziak txikiagotuaz, aukeren abantailetaz baliatuaz eta mehatxuak ezabatu ala murriztuaz.

Metodo hau enpresaren ingurune lehiakorra bi ikuspuntutatik aztertzean datza: bata kanpokoa eta bestea barrukoa.

Kanpo analisia

Kanpo analisian aukera eta mehatxu moduan sailkatuak izan daitezkeen ekintza, gertaera eta joerak aztertzen dira. Produkzioa, marketinga eta finantziazioa bezalako faktoreak kontuan hartu beharrekoak dira, besteak beste, analisi hau egiterakoan.

Aukera: enpresak bere onurarako erabil ditzakeen kanpo faktoreak. Jarraian enpresak aukerak zeintzuk izan daitezkeen ezagutzeko galdera batzuk egin diezaizkioke bere buruari: “merkatuko zein joerataz daukagu informazioa?”; “zein aldaketa ari dira ematen bizitza estiloetan?”

Mehatxua: enpresaren errendimendu onaren erdiespena zaildu dezaketen kanpo faktoreak. Mehatxu hauek garaiz antzemanez gero sahiestuak ala aukera bihurtuak izan daitezke. Galdera hauek lagungarri gerta daitezke: “zein oztopo aurki ditzakegu?”; “zertan ari dira lehiakideak?”

Barne analisia

Barne analisian indargune eta ahuleziak aztertzen dira, beti ere konpetentzia mugitzen den inguabarraren arabera, baina beti ere gertaera objetibo eta errealetan oinarriturik. Bertan enpresaren malgutasun eta dinamismoak paper garrantzitsua jokatzen dute. Barne analisia egiterako orduan ingurunea, interes taldeak, legedia, aspektu demografiko eta politikoak kontuan hartu beharko dira.

Indargune: enpresari bere helburuak lortzen lagun diezaieketen barne ahalmenak dira. Galdera hauek erantzunez errazago lor daitezke: “lehiakideengandik zertan desberdintzen gara?”; “zer dakigu hobekien egiten?”

Ahuleziak: barneko mugak dira, enpresak bere helburuak lortzeko dituen ahalmenak oztopatu ditzakeelarik. Jarraian lagungarri gerta daitezkeen bi galdera proposatzen dira: “zer hobetu daiteke?”; “ zein faktorek murrizten dituzte salmentak?”