Hubert de Givenchy
Hubert de Givenchy (izen osoa Hubert James Marcel Taffin de Givenchy) (Beauvais, Oise, 1927ko otsailaren 21a) frantziar jostun bat da. 1945ean, Arte Ederretako Eskolan sartu zen, eta Jacques Fathekin hasi zen lanean. Gero, Piguetekin ikasi zuen, ondoren, Lelongekin, eta, azkenik, Schiaparellorekin, zeinarekin lan egin baitzuen lau urtez. 1951n, Parisa aldatu zen, eta hurrengo urtean aurkeztu zuen lehen bilduma, Bettina modeloarekin. Givenchyk Bettina izena jarri zion, hain zuzen ere, berak asmatu eta ospe handia lortu zuen alkandora bati. Modelo harekin egindako lanak berehalako ospea eman zion, eta prêt-à-porter denda bat zabaldu zuen 1954an. Hubert de Givenchyk Balenciaga maisuaren zenbait bezero ospetsurentzat lan egin zuen. Maisuaren tradizio klasizistaren jarraitzaile izan zen, eta jantzi dotore, soil, eroso eta klasikoak egin zituen, oro har, garaian garaiko bitxikeriak alde batera utzirik. Jantziak ez ezik, lurrinak ere sortu zituen Givenchyk, hala nola Interdit eta De (1957), Givenchy III (1970), Ysatis (1968) eta Amarige (1991) emakumezkoentzat, eta Monsieur de Givenchy eta Vetyver (1959) gizonezkoentzat.
Kanpo loturak
- (Frantsesez) Givenchyren web-orria
Erreferentziak
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.