Terms of Endearment

Terms of Endearment (euskaraz Maitasun Loturak) 1983ko James L. Brooks estatubatuar zinema zuzendari, gidoigile eta zinema ekoizleak zuzendu, egokitu eta ekoiztutako drama-komedia filma bat da. Larry McMurtry idazlearen izenburu berdineko Terms of Endearment eleberrian oinarritua dago. Shirley MacLaine, Debra Winger, Jack Nicholson, Danny DeVito, Jeff Daniels eta John Lithgow aktoreek antzeztu zuten.

Filmak Aurora Greenway ama (MacLaine) eta Emma alabaren (Winger) arteko 30 urtetako harremana agertarazten du. Bitxikeria gisa, filma burutu aurretik, James L. Brooks zuzendari, gidoigile eta ekoizleak Garrett Breedloven pertsonaia Burt Reynolds aktoreak antzez zezan eskeini zion, baina honek The Cannonball Run filmean antzezteko hitzemana zegoenez, eskeintzari uko egin eta Jack Nicholsonek ordezkatu zuen, Gerora, filmak bereganatutako arrakasta eta sarien ondoren, Burt Reynoldsek hartutako erabaki hartaz nahiz bere buruaz honako esaldi sarkastikoa aipatu zuen: "Hollywooden ergela izateagatik ez da saririk jasotzen".

Oscar Sarietarako hamaika izendapen jaso zituen, bost irabaziz: Film onenaren Oscar Saria, Zuzendari onenaren Oscar Saria (James L. Brooks), Egokitutako gidoi onenaren Oscar Saria (James L. Brooks), Emakumezko aktore onenaren Oscar Saria (Shirley MacLaine) eta Gizonezko bigarren aktore onenaren Oscar Saria (Jack Nicholson). Bestalde, lau Urrezko Globo Sari ere irabazi zituen.

Argumentua

Aurora (Shirley MacLaine) eta Emma (Debra Winger) oso harreman estua duten ama-alabak dira, baina bizitzaz ikuspuntu arras ezberdinak dituztenak. Aurora, alarguna da, jenio biziko baina bihotz oneko emakumea, eta Emma etxetik kanpo bizitzeko irrikitan dagoen neska gazte errebeldea, txarrena hori lortzeko bide konbentzionalena hautatuko duela da: ezkontzea. Bere aldetik, Aurorak bitartean, Garrett Breedlove (Jack Nicholson) astronauta ohiarekin maitasun harreman bat du. Urteak igaro hala, ama eta alabak elkar jasan eta zoriontasuna topatzeko biderik honena aurkitzen saiatuko dira.

Aktoreak

• Shirley MacLaine: Aurora Greenway
• Debra Winger: Emma Greenway-Horton
• Jack Nicholson: Garrett Breedlove
• Danny DeVito: Vernon Dahlart
• Jeff Daniels: Flap Horton
• John Lithgow: Sam Burns
• Lisa Hart Caroll: Patsy Clark
• Huckleberry Fox: Ted "Teddy" Horton
• Troy Bishop: Tom "Tommy" Horton
• Megan Morris: Melanie Horton
• Kate Charleson: Janice

Kanpo loturak

• Terms of Endearment filmaren IMDBko fitxa irakurgai (Ingelesez)