Accattone
Accattone 1961eko Pier Paolo Pasolini italiar zinema zuzendariak zuzendutako drama film bat da. Zinemazale eta kritikariek film honetan Pasoliniren lehenbiziko eleberrien eragina ikusi ohi dute, tartean Ragazzi di vita ("Kaleko mutilak") eta Una vita scellerata ("Bizitza bortitz bat"). Franco Citti, Franca Pasut eta Silvana Corsini aktoreek antzeztu zuten.
"Accattone" izenburua berez filmaren protagonistaren ezizena da, eta italieraz 'zarpail' esan nahi du.
Sorrera
Pasolini arreta handia erakartzen ari zen Italiako hedabideetan bere idazkiak eta adierazpenak zirela eta. Federico Fellinik bere filmegintza-estudioak ireki zituen, eta Pasolini gonbidatu zuen harekin lan egitera. Pasolinik gidoi ausart bat ondu zuen eta errodatzeari ekin zion, Federico Fellinik hari astebeteko finantzaketa segurtatu ondoren. Gainera, Federicok Ricardo anaia bidali zuen Pasoliniren errodatzeetara Pasoliniren filmegintzako trebezia egiaztatzera.
Ricardok txosten bat prestatu zuen orduan, eta Federico ez zen konbentzituta atera. Ondorioz, Pasolini finantzaketarik gabe geratu zen. Hala ere, Alfredo Bini interesatu zen orduan filmea finantzatzeari buruz, eta berak ekoitzi zion filmea Pasoliniri.
Harrera
Filma berrikuntza handia izan zen hainbat alderditatik, hizkuntzaren eta gaien gordintasuna batez ere. Horregatik, Italia kontserbadoreak kritikatu egin zuen, baina ikusleek harrera ona eman zioten, eta Pasolinik Mamma Romari ekin zion honen ondoren, gai berekoa.
Argumentua
Erroma. Vittorio "Accattone" (Franco Citti) egun osoa proxeneta gisa taberna zuloan sarturik igarotzen duen artean, harekin bizi den Maddalena izeneko emakumeak hura mantetze aldera prostituzioan jarduten du. Maddalena (Franca Pasut) atxilotua eta espetxeratua denean, Accattonek bere bizi baliabidea galdu eta bizimodu ziztrina izatera beharturik egongo da. Urteak elkar ikusi gabe egon arren, Ascenza emazteari (Paola Guidi) derrigorrez laguntza eskatu beharko dio.
Aktoreak
- Franco Citti: Vittorio "Accattone" Cataldi
- Franca Pasut: Stella
- Silvana Corsini: Maddalena
- Paola Guidi: Ascenza
- Adriana Asti: Amore
- Luciano Conti: Il Moicano
- Luciano Gonini: Piede D'Oro
- Renato Capogna: Renato
- Alfredo Leggi: Papo Hirmedo
- Galeazzo Riccardi: Cipolla
- Leonardo Muraglia: Mammoletto
- Giuseppe Ristagno: Peppe
- Roberto Giovannoni: Alemaniarra
- Mario Cipriani: Balilla
- Roberto Scaringella: Cartagine
- Silvio Citti: Sabino
- Monica Vitti (krediturik gabe): Ascenza (ahotsa)
Kanpo loturak
- Accattone filmaren iragarkia ikusgai. Youtube.com (Italieraz)
- Accattone film osoa italieraz ikusgai. Youtube.com (Italieraz)
- Accattone filmaren IMDBko fitxa irakurgai (Ingelesez)