Elizabeth Maconchy

Dame Elizabeth Violet Maconchy Le Fanu, ezaguna Elizabeth Maconchy gisa (Broxbourne, Hertfordshire, Ingalaterra, 1907ko martxoaren 19a - 1994ko azaroaren 11), britainiar musikagilea izan zen, jatorriz irlandarra.

Bere belaunaldiko ganbera-musika lanen egile nagusietako bat da.

Biografia

Sei urte zituela hasi zen musika egiten. Royal College of Musicen egin zituen ikasketak Charles Woodekin.

Béla Bartóken musikak eragin handia izan zuen Maconchyren lanetan. Beka bat lortu zuen Karel Boleslav Jirákekin Pragan ikasteko, eta han egin zituen bere lehenengo lan serioak (Kontzertua piano eta orkestrarako, eta Lurra orkestrarako suitea). Urte horretan bertan, William Le Fanurekin ezkondu zen eta Suffolken hartu zuen bizilekua.

13 kuartetoko sail bat egin zuen harizko tresnetarako 1933-1984 urteen bitartean. Ahotserako lanetan (Heloise and Abelard, besteak beste), hiru operetan eta orkestrarako lanetan argi eta garbi ikusten dira Maconchyren maisutasun teknikoa eta estilo berezia.

Zehatz-mehatz adierazi ez bazuen ere feministen aldekoa zenik, lan handia egin zuen emakumezko musikagileen alde. Composers' Guildeko lehenengo kide emakumezkoa izan zen, eta Britainia Handiko Musika Berria Sustatzeko Elkarteko lehendakari izan zen.