Harlem Shake

Harlem Shake 2013an Internet bidez zabaldutako fenomenoa da. Berez, bideo biral bat^[1] da, hau da, izugarrizko zabalkundea izan duen bideo ez komertziala. Arrakasta Filthy Frank blogalariak eman zion hasiera YouTube bidez 2013ko urtarrilaren 13an, lehenengo bideo zabaldu zuenean. Ondoren, milaka jarraitzailek fenomenoari segida eman zioten. Gaur egun ezagutzen dugun moduan, Australiako 'The Sunny Coast Skate' taldeak sortu zuen: "The Harlem Shake v1".^[2] Bideo hori izan zen, alegia, birala bihurtu zena.

Bideoaren egitura[aldatu | aldatu iturburu kodea]

Bideoetan Dj Baauer & Jeo Art ekoizleek sortutako "Harlem Shake" musika elektronikoaren konposizioa erabiltzen da, Héctor el Father, regeton estiloaren abeslaria, ahotsarekin batera; abeslari horrek "Terroristekin" esaldia behin eta berriz esaten du. Antza denez, Héctor el Fatherrek moldaketa hori ez du legalki onartu. Bideoan dantza bat errepikatzen da beti.

Egitura arruntenak bideoan bi aldi erakusten ditu:

Lehenengo unean, dantzari bakar bat agertzen da dantzatzen. Normalean, dantzariak aurpegia kasko batekin ezkutatuta dauka edo beste edozein maskararekin. Haren inguruan agertzen diren pertsonek ez diote kasorik egiten. Atal horrek hamabost segundu dirau.
Bat-batean, erritmoa eta eszena erabat aldatu egin dira: lasai eta kaso egin gabe agertzen zirenak zoro moduan hasi dira dantzatzen, sarritan objektu absurdoak eskuetan. Bigarren atal horrek beste hamabost segundu dirau.

Fenomeno bat[aldatu | aldatu iturburu kodea]

Bideoa mundu osoan zabaldu da eta mota askotako imitazioak sortu dira: erotikoak, kirol elkarteenak, The Simpsonsena^[3]... Bakarrik lehenengo bederatzi egunetan 11.000 bertsio igo ziren YouTubera eta bisitariak 44 milioitara heldu ziren.^[4]