WikiBizi ekimenerako bere garaian egin ziren Ondare sailkapenen bilketak oso praktikoak dira, erreferentzia gisa zer ikusi Euskal Herriko bazterretan, eta zerk merezi duen gehitzea gure Wikipediara. Hala ere, zerrenda horien osotasuna oso zalantzazkoa da hainbat herritan... nik suposatzen dut katalogatze / ondare erakundeak denera iritsi ezinda ibiliko direla.
Esate baterako, Zuia eta Zigoitiko ondare zerrendak. Ba hor zertxobait falta... asteburuan hiru lagunek bueltatxo bat eman, eta Commonseko lau sorta hauek sortu genituen: Ondategiko eliza eta Santa Luzia baseliza, Domaikiako San Bartolome eta Maurgako eliza, tenplu barroko ikusgarri bat. (oraindik artikulurik ez bitxi hauei buruz, egiteko asmoa...)
Eliza hauetarako sarrera ia inposiblea da. Itxita daude urte osoan ez bada hileta bat edo horrela. Ekimen baten bidez ireki dituzte joan den larunbatean eta hurrengoan, Uztailak 24, goizez. Hortaz, wikipedistok, besterik dokumentatu nahi baduzue edo besterik gabe tenpluak miretsi nahi badituzue, informazio gehiago Sustatun: https://sustatu.eus/luistxo/1626766587