Euskara: Denboran atzera

Munduko telekomunikazio sistemak. Mundua klik baten distantziara dago. Muga argiaren abiadura da, eta horrek eragingo digu beste planeta batzuetara ere konektatu nahi badugu.

Transkribapena:

Harro gaude gure telekomunikazio-sistemaz. Ustez, munduko edozein toki “klik” baten distantziara daukagu. Toki hartara ekipo egokia eramatea besterik ez da behar, kable luze bati lotuta, eta prest gaude klik bakar hori lotzeko.

Hori bai, distantziak denbora eskatzen du. Azkar komunika gaitezke, baina abiadurak muga bat du: argiaren abiadura. Eta hori garrantzitsua da, adibidez, Lurretik kanpokoarekin komunikatzeko. Lurretik Ilargira iristeko, seinaleak segundo bat behar du. Lurretik Martera, elkarrengandik gertuen daudenean, 3 minutu. Lurretik Jupiterrera, berriz, 33 minutu inguru. Eta Pluntonera, 2 ordu eta erdi.

Baina hori mundiala da. Abiadura horren muga, abantaila bihur daiteke. Plutondik Lurrari begiratuta, duela bi ordu eta erdi gertatutakoa ikusten da, edo lehenagokoa, Pluton ez badago gertueneko puntuan. Ez badut gogoratzen non utzi dudan autoa, Plutongo teleskopio batetik begiratuta ikus dezaket non aparkatu dudan. Edo jakin nahi badugu maiordomoak hil ote duen etxekoandre aberatsa ala ez, ordu batzuetako marjina dugu Plutondik begiratuta gertatutakoa ikusteko. Asmakizun ederra.

Hala ere, arazo bat du horrek: teleskopioari agindua eman behar zaio, norantz begiratu behar duen. Eta agindu horrek ere bi ordu eta erdi behar ditu Plutoneraino iristeko.