Txikipedia:Bizkarrezur-muin
Bizkarrezur-muina ornodunek bizkarrezurraren barnean duten nerbio-kordoia da; entzefaloaren luzapena dela esan daiteke, eta harekin batera nerbio-sistema zentrala osatzen du. Burezurreko zulogune okzipitalean hasten da eta lehen orno lunbarreraino iristen da (45 cm inguruko luzera du). Burezurra entzefaloa babesten duen hezur-egitura den bezala, bizkarrezurra da bizkarrezur-muina babesten duena.
Bizkarrezur-muinaren egitekoa
[aldatu | aldatu iturburu kodea]Burmuinaren luzapena da, eta burmuinaren aginduak gorputzera hedatzea eta gorputzak burmuinera bidaltzen dituen sentsazioak garraiatzea da haren egitekoa. Horretarako, 31 nerbio espinal abiatzen dira bizkarrezur-muinetik, aipatutako sentsazio edo seinaleak garraiatzeko.
Istripu baten ondorioz, gerta daiteke bizkarrezurra apurtzea; holakoetan, burmuinaren eta gainerako gorputzaren arteko komunikazioa eten egiten da, bizkarrezur-muinak ezin duelako bere egitekoa bete. Paraplejia deitzen zaio horri; paraplejikoek desagertuta dauzkate gorputzaren behealdeko funtzioak (hanken mugikortasuna eta gorputz-atal horien sentsazioak).