Ainhoa Alberdi
| Ainhoa Alberdi | |
|---|---|
 Ainhoa Alberdi, zentroan, Iraia Eliasekin antzezlan batean. 2010. | |
| Bizitza | |
| Jaiotza | Zarautz, 1969ko urtarrilaren 14a (56 urte) |
| Herrialdea |  Gipuzkoa, Euskal Herria |
| Hezkuntza | |
| Hizkuntzak | euskara gaztelania |
| Jarduerak | |
| Jarduerak | aktorea, sortzailea eta dantzaria |
  | |
Ainhoa Alberdi (Zarautz, 1969ko urtarrilaren 14a - ) euskal aktorea, sortzailea eta dantzaria da.[1] Antzerkiari lotuta egin du bizitza osoa, eta hainbat talde eta proiektutan hartu du parte. Zuzendari lanetan ere aritu da Gernikaren heriotza, Txikago kluba (kale antzerkia), Marmarrak (bakarrizketa) eta beste hainbat lanetan. Zarauzko Alproja taldeko kide da 1995. urtetik, baita KALERKI (Nazioarteko Kale Antzerki Topaketak) jaialdiaren antolatzailea ere.[2][3]
Bizitza
[aldatu | aldatu iturburu kodea]Txikitatik bizi izan du antzerkia. Umetan txikiagoak zirenei txotxongiloa egiten zien, lagun batzuekin batera. 13 bat urterekin Zarautzen Irrintzi taldeko kide ohi batzuek egindako lan batzuetan hartu zuen parte. Gero, Algara taldean eman zituen urte batzuk Mikel Barrentzorekin.[3]
Nahiago izan du gorputz adierazpenean gehiago oinarritutako antzerkia, gidoi txikiagoa duena. Zorroagan Antzerti izeneko eskolan izena emateko zorian egon zen. Psikologia ikasten hasi zen eta albo batera utzi zuen antzerkia. Unibertsitatean ere irakasle batek psikologia eta antzerkia lotzen zituen irakurgai batzuk gomendatu zizkion behin eta garbi ikusi zuen horixe zela bere bidea.[3]
Psikologiako laugarren urtea egitera Bartzelonara joan zen. Urte hartan antzerki tailer bat egin zuen. Bartzelonatik etorrita, ikasketak amaitu eta psikoterapia egin zuen, psikoterapia bioenergetikoa. Gorputzarekin, energiarekin, arnasketarekin eta gorputzeko blokeo emozionalarekin zerikusia duen adar bat da bioenergetika. Horrek gorputzarekin, emozioekin eta mugimenduarekin jarri zuen harremanetan. Antzerkiarekin zerikusia bazuela konturatu zen.[3]
Ainhoa Alberdiren hitzetan:
“Antzerkiak probokazio puntua izan behar du, hau da, astintzailea eta zirikatzailea.”[4]
Formazioa
[aldatu | aldatu iturburu kodea]| Urtea | Títulua | Zentro - Irakaslea |
|---|---|---|
| 2018 | Maskarak | Pablo Inarluzea |
| 2018 | Performance | Espe Lopez |
| 2015-18 | Butoh dantza | Lee Rizdome, Jonathan Martineau, Matilde Ciria |
| 2015-17 | Kontakt dantza | Cristiane Boullosa, Diana Bonilla |
| 2010-11 | Adierazpen-maskarak | Family Flo |
| 1999-2001 | TAE Donostia |
Lan ibilbidea
[aldatu | aldatu iturburu kodea]Lehenengo haurra izan ondoren, espresiogunea izeneko tailer batzuk egin zituen EHUn. Gero, Patxi Santamaria aktore zarauztarrak eskaini zion eskoletan antzerkia emateko aukera eta batera, Zarauzko Olerti Etxean antzerki lan batean parte hartzekoa ere. Paul Austerren Ezkutalekua obrarekin eta beste lantxo batzuekin hasi eta orduantxe ikusi zuen profesionalki aritzeko aukera. Sasoi hartan Idoia Etxeberria Elortzaren Bakartxo bakarrizketa egin zuen. Ez zen familiako lehena izan, aitonaren anaia batek ere bakarrizketak egiten zituen eta.[3]
2004 urte inguruan bere kontura antzerki ikastaroak eta espresio tailerrak ematen hasi zen haur, gazte zein helduei. Ematen dituen antzerki eskoletan, batez ere, gorputz adierazpena lantzen du.[3]
Kalerki udako Nazioarteko Kale Antzerki Topaketa jaialdian aktore izan da eta antolatzailea izatera ere pasatu da. Klerki dela eta, hauxe esan zuen:
Kalera irten eta inprobisatu, saltsan ibili... jendearen hurbiltasuna izugarria da eta energia hori ukitu egiten duzu. Agertokian ere gertatzen da hori, baina kalean desberdina da; jendea gainean daukazu, gauzak esaten dizkizu, entzun egiten dituzu, horrekin jolastu behar duzu, publikoa ere antzezle bihurtzen da-eta. Hori da kaleko magia, hori da Kalerkiko egunetan sentitzen dena kaleetan.[3]
Lanak
[aldatu | aldatu iturburu kodea]Besteak beste, lan hauexetan hartu du parte:[5]
Antzerkia
| Urtea | Lana | Konpainia | Zuzendaria |
|---|---|---|---|
| 2024 | Ilargiaren alabak[6][7] | Pez Limbo | |
| 2018 | A. Lurpan | Ttakteatroa+ Kolektiboa | Amancay Gaztañaga |
| 2018 | Zanbuia | Metrokoadroka | Metrokoadroka |
| 2017-18 | Oxid[4] | Pez Limbo | Raul Camino |
| 2016 | Mr señora | Metrokoadroka | Metrokoadroka |
| 2013-14 | Gabrielen lekua sentikaria | Metrokoadroka, Kolektiboa | Metrokoadroka |
| 2013 | Zertarako hegoak | Metrokoadroka | Metrokoadroka |
| 2012 | Eta orain ze? | Ttak teatroa | Ttak teatroa, Miren Alcala |
| 2011 | Inorako bidea | Kukubiltxo | Aristides Vargas |
| 2009-11 | Jules Verneren azken bidaia | Gorakada | Alex Diaz |
| 2008-18 | Zapatak | Ttak teatroa | Ainara Gurrutxaga |
| 2008-12 | Eta Karmele? | Ttak teatroa | Ttak teatroa |
| 2008-10 | Irudimenezko hiria | Gorakada | Alex Diaz |
| 2003-04 | Erpurutxo | Achiperre teatroa | Achiperre |
| 2003 | Olentzero sua hilda | Hegohaize | |
| 2002/2003 | Titibiliti | Bederen 1 | I. Tolosa |
| 2001/2004 | Bakartxo | Bederen 1 | P. Santamaria |
| 2001 | Vaya marcha de asilo | Hegohaize | |
| 2001 | Agur bihemia | Olerti etxea | |
| 2001 | Indartsuena | Olerti etxea | |
| 2001 | Libra bat kobratu nahi | Olerti etxea | |
| 2000/2002 | Recitales de poesía | Olerti | |
| 2000/2001 | Los abuelos no deben... | Bederen 1 | I. Tolosa |
| 2000/2001 | Ezkutalekua |
Telebista
[aldatu | aldatu iturburu kodea]| Urtea | Lana | Katea | Kategoria | Zuzendaria |
|---|---|---|---|---|
| 2007-08 | Pilotari | ETB1 | Pertsonaia | Emilio Mcgregor, Egoitz Rodriguez |
| 2007 | Cuentame | TVE | Pertsonaia | |
| 1998/1999 | Goenkale | ETB 1 | Figurazioa |
Zinema
[aldatu | aldatu iturburu kodea]| Urtea | Lana | Zuzendaria | Rola | Ekoizlea |
|---|---|---|---|---|
| 2017 | Zain (film laburra) | Pello Gutierrez | Protagonista | Zazpiterdi |
Erreferentziak
[aldatu | aldatu iturburu kodea]- ↑ (Gaztelaniaz) Ainhoa Alberdi - Zarautz, Gipuzkoa - Azken Muga. (Noiz kontsultatua: 2025-01-21).
- ↑ «Ainhoa Alberdi. Actriz y organizadora del Festival de Teatro Callejero de Zarautz: La calle tiene otra magia, el público se siente atrapado en la obra» www.eusko-ikaskuntza.eus (Noiz kontsultatua: 2025-01-21).
- ↑ a b c d e f g «Ainhoa Alberdi. Aktorea eta Zarauzko Kale Antzerki Jaialdiaren antolatzailea: Kaleak beste magia bat du, publikoa antzezlanaren barruan harrapatuta sentitzen da - Euskonews» www.euskonews.eus (Noiz kontsultatua: 2025-01-21).
- ↑ a b «Ainhoa Alberdi: “Antzerkiak probokazio puntua izan behar du, hau da, astintzailea eta zirikatzailea” - Zumaia» Zumaiaguka.eus (Noiz kontsultatua: 2025-01-21).
- ↑ (Gaztelaniaz) Iametza. «AINHOA ALBERDI» euskalaktoreak.eus (Noiz kontsultatua: 2025-01-21).
- ↑ «'Ilargiaren alabak' antzezlana estreinatuko du Pez Limbok asteartean, hilekoa ardatz hartuta» Berria 2024-10-24 (Noiz kontsultatua: 2025-01-21).
- ↑ «Ainhoa Alberdi: "Gure tripetatik sortuta dago; gure arima eta bihotza hor daude" - Azpeitia» azpeitiaguka.eus (Noiz kontsultatua: 2025-01-21).
Kanpo estekak
[aldatu | aldatu iturburu kodea]| Autoritate kontrola |
|
|---|
Datuak: Q12252930