Ardatz akromatiko

Wikipedia, Entziklopedia askea
Jump to navigation Jump to search
Ardataz akromatikoa mikroskopioan ikusita, mitosiaren metafasean. Mikrotubuluak berde kolorean daude, kromosomak urdinean eta zinetokoroak gorrian

Ardatz akromatikoa edo ardatz mitotikoa zentrioloetatik sortzen den egitura zelularra da, mikrotubuluz osatua, funtsezko zeregina betetzen duena ugalketa zelularraren prozesuetan (mitosian eta meiosian). Prozesu horietan, ardatz akromatikoak kromosomak banatzen ditu bi zelula alaben artean.

Akromatikoa deritzo mikroskopian erabiltzen diren koloratzaileekin tindatzen ez delako.

Mitosiaren profasean, zentrosomaren bi zentrioloak zelularen polo banatara joaten dira. Zentrioloak mugitzerakoan, ardatz akromatikoa agertzen da, bi zentrioloak (profasearen bukaeran zelularen bi muturretan daudenak) lotzen dituena. Ardatz akromatikoa, beraz, mitosiaren profasean agertzen da (zelularen interfasean ez da ikusgaia).

Mitosiaren metafasean, aldiz, kromosomak ardatz akromatikoaren erdian jartzen dira, ardatz akromatikoaren planoarekiko plano zut batean jarriz (plaka ekuatorial izeneko egitura sortuz).Kromosoma bakoitzaren kromatidak zentromeroaren bidez lotzen dira ardatzaren mikrotubuluetara.

Mitosiaren anafasean ardatzaren mikrotubuluak laburpen-mugimendu bat burutzen dute eta, ondorioz, kromosoma bakoitzaren bi kromatidak banatu eta zelularen kontrako poloetara abiatzen dira.

Zinetokoroak kromosomen zentromeroetan dauden proteinazko laminak dira, ardatz akromatikoaren mikrotubuluetan finkatzen direnak.

Landare-zelula askotan ez dago zentriolorik, eta bertan ardataz akromatikoa mikrotubuluen gune antolatzaile izeneko egituran sortzen da.