Floreaga etxea

Floreaga etxea
	Kultura ondasuna
	Alde Zaharra (Azkoitia)
	Irudi gehiago
Kokapena
Herrialdea	Euskal Herria
Probintzia	Gipuzkoa
Udalerria	Azkoitia
Koordenatuak	43°10′44″N 2°18′44″W / 43.17896°N 2.31234°W
Historia eta erabilera
Eraikuntza	XVI. mendea
Arkitektura
Estiloa	arkitektura gotikoa; pizkundetar arkitektura
Ondarea
BIC	RI-51-0001471
	45

Floreaga etxea Gipuzkoako Azkoitia udalerrian dagoen dorretxe bat da, Azkoitiko Alde Zaharraren alboan dago. 1964ean Gipuzkoako kultura ondasuna izendatua izan zen. Gaur egun, bertan jatetxe bat dago.

Historia

1515ean Santxo Sánchez Zuazolakoaren oinetxe zaharraren gainean, haren iloba Pedrok, Karlos V.a Espainiakoa enperadorearen diruzain nagusi izatera iritsi zenak, mudejar estiloan etxe bikain hau eraikiarazi zuen. Haren ondorengoek Loiolatarrekin bat egin zuten, eta hango jaun eta andre izatera ere iritsi ziren. 1677tik aurrera, Garciezko konde-kondesen administraziopera pasatu zen eta jatorrizko ospea galdu egin zuen.^[1]

Eraikina

Oinplano angeluzuzena du, eta lau solairu eta ganbara. Beheko solairua eta solairuartea harlanduxkan egin zituzten, eta adreilu barne-betea erabili zuten gainerakoetan.

Beheko solairuan ezker eta eskuin aldeetako sarbideak dira elementurik nabarmenenak; ezkerrekoak arku zorrotza du, eta konopiala eskuinekoak. Goiko solairuetan ere ageri dira zenbait bao zorrotz, konopial, eskartzano eta dinteldun, ordena handirik gabe jarriak. Aurreko aldean ez da halakorik; hor hiru galeria ageri dira (arku karpanelak dituzte), bata bestearen gainean jarria, eta itxura oso berezi eta ezohikoa ematen diote eraikinari. Alde horrek herrira ematen du, eta adreiluz egindako apaindura deigarriak ditu.