Txikipedia:Burrun

Burruna.

Burruna aerofonoen familiako soinu-tresna da. Furrufarra edo zurrunbera ere esan izan zaio. Ingelesez bullroarer izena hartzen du, eta gazteleraz zumbadora.

Nolakoa da?

Zurezko taulatxo luzexka bat da. Mutur batean duen zulo batetik soka bat pasatzen da. Tokian toki neurri eta itxura ezberdinak hartzen dituzte.

Nola jotzen da?

Juan Mari Beltran burruna jotzen.

Sokaren mutur batetik heldurik, taulatxo hori abiadura bizian airean bueltaka jartzen da, zurrunbilo hotsa emanez. Abiaduraren arabera hotsaren tonua aldatzen da.

Zertarako jo izan da Euskal Herrian?

Haurrek jolasteko erabili izan dute, eta animaliak uxatzeko ere erabili izan dira halakoak.