Valentina Terexkova

Wikipedia, Entziklopedia askea
Jump to navigation Jump to search
Valentina Terexkova 2017. urtean.

Valentina Terexkova espaziora bidaiatu zuen lehen emakumea izan zen. Geroago, Sobietar Batasuneko eta Errusiako politikan ere parte hartze handia izan zuen. Bere ekarpenengatik, Terexkova Sobietar Batasuneko heroi izendatu zuten, eta bi aldiz jaso zuen Leninen Ordena izeneko saria.

Bizitza[aldatu | aldatu iturburu kodea]

1937ko martxoaren 6an jaio zen, Maslennikovon hirian, Mosku ez oso urruti. Une horretan, Errusia Sobietar Batasuna (SESB) izenarekin ezagutzen zen herrialdearen parte bat zen. Aita Bigarren Mundu Gerran hil zuten, eta, beraz, oso gaztaro zaila izan zuen. Terexkova ez zen eskolara joaten hasi 10 urte bete arte. Geroago, 17 urte zituela, pneumatiko fabrika batean sartu zen. Ehungintza fabrika batean ere lan egin zuen.

Terexkova komunista porrokatua bihurtu zen. Gazteen Liga Komunistan sartu zen, eta geroago Alderdi Komunistan. Paraxutismoa ere egiten hasi zen, hobby gisa. Juri Gagarinek bere espazio-hegaldia egin zuenean, Terexkovak haren bidetik jarraitu nahi izan zuen; Gagarin sobietar kosmonauta bat izan zen, espaziora hegan egin zuen lehen pertsona. Terexkovak kosmonauta izatea eskatu zuen 1961ean.

Espazioa eta politika[aldatu | aldatu iturburu kodea]

Sobietar Batasuneko espazio programan onartu zuten eta 1962an hasi zen entrenatzen. 1963ko ekainaren 16an espaziora jaurti zuten Vostok 6 espaziontzian. Lurraren 48 orbita osatu zituen 71 ordutan; hau da, 48 buelta eman zizkion Lurrari.

Terexkovak ez zuen jarraitu kosmonauten programan. Laster, 1966an, SESBeko Sobiet Gorenean (legebiltzarra) hasi zen lanean eta 1991ra arte jarraitu zuen, Sobietar Batasuna desagertu zen arte, alegia. Errusia, orduan, herrialde independente bihurtu zen. Terexkovak Errusiako politikan parte hartzen jarraitu zuen.