Achille Zo

Jean-Baptiste Achille Zo, ezagunagoa Achille Zo izen-deiturez (Baiona, Lapurdi, 1826 - Bordele, Okzitania, 1901) margolaria izan zen. Haren seme Henri-Achille Zo (1873-1933) ere margolari aipagarria izan zen.

Bizitza

Oso gaztea zelarik Parisera bizitzera joan zen eta bertan egon 1871 arte; han Thomas Couture frantziarraren ikaslea izan zen. Baionako (1871ean) eta geroago Bordeleko (1889an) Arte Ederretako Eskoletako zuzendaria izan zen.

Ekoizpen handiaren egile, gehienbat gai «exotiko»ez margotzen gailendu zen: zezenketak, «espainiar giroko irudiak» edota Ipar Afrikako emakumeak, kasurako.

Zoren artelanak, besteak beste, Parisko Orsay Museoan eta bereziki Baionako Léon Bonnat museoan daude ikusgai. Achille Zoren jaioleku Baionak margolaria omendu du Rene Cassin parkean dagoen estatuaren bidez.

Obra nagusiak

Sinestunaren ametsa: olio-pintura ehunaren gainean. 1870eko Saloian aurkeztu zen eta nahiko ezaguna bihurtu zen Goupil delako konpainiak koadroari ateratako argazkia posta-txartel bihurtu eta hedapen handia izan zuenean.
Ibilaldia Getariaren inguruan
Sevillako katedrala: olio-pintura ehunaren gainean. Léon Bonnat museoan ikusgai.
Urreliliak eta beste lore batzuk ontzi batean: olio-pintura ehunaren gainean.
San Rafael ostatua, Kordoban: 1861eko olio-pintura; hau ere Baionako Bonnat museoan ikusgai.
Ijitoak: arratsaldeko atsedenaldia: 1861eko olio-pintura ehunaren gainean. Arroxelako Arte Ederretako museoan ikusgai.

Kanpo loturak

Wikimedia Commonsen badira fitxategi gehiago, gai hau dutenak: Achille Zo

Datuak: Q1685328
Multimedia: Achille Zo (Jean Baptiste) / Q1685328