Alpino Uzturre mendi elkartea

Wikipedia, Entziklopedia askea
Alpino Uzturre mendi elkartearen egoitzaren inaugurazioa 1962an. Aurrean Josetxo Sasieta elkarteko lehendakaria, Karlos Agirre apaiza eta Enrique Ortiz de Zarate Tolosako alkatea.

Alpino Uzturre mendi elkartea Tolosan sortu zen 1958ko abenduaren 13an egin zen batzarrean. Aurretik Tolosa CFko bazkide izan ziren 100 bat mendizale izan ziren elkarte berriaren bultzatzaile. Guztira 300 sinadura bildu zituzten elkarte berria sortzeko.[1]

Egoitza[aldatu | aldatu iturburu kodea]

Korazonisten elizan hasi ziren biltzen, Kordimarianako lokaletan, baina 1962an Gudari kalean erosi zuten gaur egun mantentzen duten egoitza.

Aktibitateak[aldatu | aldatu iturburu kodea]

Alpino Uzturre mendi elkartearen historian zehar izandako lehendakariak, 50. urteurrenean elkartuta, 2008an.

Alpino Uzturreren aktibitate nagusia mendia izan da. Urtean zehar hilero igande batean mendi irteera bat antolatzen da Euskal Herriko mendietara eta udan, asteburuko edo egun batzuetarako irteerak Pirinioetara[2]. Haurrentzako irteera bereziak ere askotan antolatzen ditu.

Naturarekin erlazionatuetako beste kiroletan ere aritzen da elkartea. Bereziki iraupen eskiak garrantzi berezia izan du bere sorreratik. Garai batean eskiatzera joateko autobusak, ikastaroak eta probak antolatzen zituen Aralarren. Eta bere historian zehar eski talde garrantzitsua izan da Euskal Herriko, estatuko eta nazioarteko probetan parte hartuz. Eskirako entrenamendu gisa, rolleski proba antolatzen du urtero. Hernialdeko igoera. Asko izan dira estatu mailan nabarmendu diren eskiatzaileak, baina denen artean bereziki aipatu behar dira Joseba Rojo[3] eta 2014 eta 2018ko Olinpiar Jokoetan parte hartzera iritsi den bere anaia Imanol Rojo[4][5][6].

Eskalada, espeleologia, mikologia, mendiko bizikleta... ere jorratu ditu elkarte honek bere historian zehar. Eskaladan, gailur garrantzitsuak lortzearekin batera[7], oihartzun handia izan zuten bi bazkideren heriotz istripuak aipatu behar dira: Angel Etxedona Etxaurin 1966an eta Patxi Berrio (Oargiko Ramon Ortizekin batera) Narancon 1969an. Horrekin batera mendiarekin eta naturarekin erlazionatutako hitzaldiak, proiekzioak eta mahai-inguruak antolatu izan ditu.

Espedizio bereziak[aldatu | aldatu iturburu kodea]

Elkarteko hainbat partaide izan dira atzerrira egindako espedizio batzuetan: Alpeak (1974), Laponia eskiz (1974), Kenia (1978), Pico Comunismo (1982), Groenlandia eskiz (1988)[8][9], Tamanrasset-Argelia bizikletaz (1990), Cerro Torre (1996), Nanga Parbat (2006)...

50. urteurrena[aldatu | aldatu iturburu kodea]

Alpino Uzturre mendi elkarteko mendizaleak Uzturren, 2008ko Urte Berri egunean, 50. urteurreneko ekitaldien hasiera modura.

2008an 50. urteurrena ospatu zuen Alpino Uzturre mendi elkarteak eta ekitaldi ugari izan ziren urte osoan zehar, ohikoez gain. Urte Berri egunean mendizale ugari elkartu zen Uzturren, urteurren urteari hasiera emateko. Ekainean federazioaren katalogoan agertzen diren Gipuzkoako mendi puntuagarri guztiak igo zituzten Alpinoko bazkideek[10], 1971ean eta 1976an egin zen bezala. Abuztuan Marokkoko Atlas mendikatera hamabost eguneko irteera burutu zen. Urrian mikologia erakusketa antolatu zen plaza Zaharrean[11], Aranzadi zientzia elkartearekin batera, aurreko egunetako elkarteko mendizaleek jasotako espeziekin, garai batean bezala. Azaroan haurren ibilaldia egin zen Uzturre eta Belabietan[12]. Eta abenduan elkartearen historia jasotzen duen "Uzturretik mundura" liburua aurkeztu zen[13] eta bazkideen arteko bazkaria egin zen urteurrena bukatzeko.[14]

Erreferentziak[aldatu | aldatu iturburu kodea]

  1. Gonzalez, Josema; Saizar, Joxemi. (2008). Uzturretik mundura. Igela ISBN 978-84-87484-08-7..
  2. «50 urteko irudiak -» Tolosaldeko ataria (Noiz kontsultatua: 2021-09-28).
  3. (Gaztelaniaz) «El esquiador tolosarra Joseba Rojo ha ganado la popular Marxa Beret» El Diario Vasco 2006-02-09 (Noiz kontsultatua: 2021-09-28).
  4. (Gaztelaniaz) SA, Baigorri Argitaletxea. (2014-02-06). «De la Cuesta, Rojo y Egibar quieren sacar provecho de la visita al balneario ruso» GARA (Noiz kontsultatua: 2021-09-28).
  5. (Gaztelaniaz) ««Es un orgullo representar a Tolosa en los Juegos Olímpicos de Sochi»» El Diario Vasco 2014-02-06 (Noiz kontsultatua: 2021-09-28).
  6. «Imanol Rojo garaile, 41. Beret Martxan - Tolosa» Tolosaldeko ataria (Noiz kontsultatua: 2021-09-28).
  7. «Irurtzungo Biaizpe igotzen lehenak - Tolosa» Tolosaldeko ataria (Noiz kontsultatua: 2021-09-28).
  8. «Groenlandia 88 espedizioa: muturreko bidaia bat gogora ekarriz - Tolosa» Tolosaldeko ataria (Noiz kontsultatua: 2021-09-28).
  9. «Groenlandia 88, 30 urte geroago bidaia zoragarri hura gogora ekarriz - Tolosa» Tolosaldeko ataria (Noiz kontsultatua: 2021-09-28).
  10. (Gaztelaniaz) «El Alpino conmemoró su aniversario subiendo a todos los montes de Gipuzkoa» El Diario Vasco 2008-07-02 (Noiz kontsultatua: 2021-09-28).
  11. (Gaztelaniaz) «Tolosa micológica» El Diario Vasco 2008-10-12 (Noiz kontsultatua: 2021-09-28).
  12. (Gaztelaniaz) «134 niños participaron en la marcha regulada del Alpino con motivo de su 50 aniversario» El Diario Vasco 2008-11-11 (Noiz kontsultatua: 2021-09-28).
  13. (Gaztelaniaz) «El Alpino Uzturre presenta el libro de su cincuenta aniversario» El Diario Vasco 2008-12-12 (Noiz kontsultatua: 2021-09-28).
  14. (Gaztelaniaz) ««Mientras haya ilusión por parte de los socios, el club estará vivo»» El Diario Vasco 2008-12-18 (Noiz kontsultatua: 2021-09-28).

Kanpo estekak[aldatu | aldatu iturburu kodea]