Mertzenario

Mertzenarioa, onura pertsonala suposatuko duen zerbaiten truke, gerra edo gatazka armatu batean borroka egiten duen norbait da, herrialde horretako edo beste bateko ejertzito ofizialeko partaide izan gabe. Orokorrean, mertzenarioek diru edo bestelako elementuren baten bidezko ordainketaren truke egiten dute borroka, eta ez interes politiko batzuei jarraituz. XX. mendetik aurrera, mertzenarioen rola gero eta txikiagoa izan da konfliktu militarretan; izan ere, Genevako Hitzarmenak ezartzen du konfliktu batean mertzenarioak ez direla borrokalari zilegiak, eta, ondorioz, harrapatuak izanez gero, ez dituzte beste indar armatuen berme juridiko berberak.

Hala ere, gaur egun mertzenarioen berrindartze bat ikusten ari gara munduko hainbat konfliktutan, enpresa militar pribatuen izenpean.

Kasu askotan ez da erraza izaten mertzenarioa zer den zehaztea. Konfliktu militar askotan finantza interesak eta interes politikoak banatzea ez baita bere horretan erraza izaten.