Peep show

Peep show edo peepshow bat lupa edo zulo txiki baten bitartez ikusten diren irudi, objetu edo pertsonez osatutako erakusketa bat da. Historikoki peep show izenarekin herriz herri antolatzen zen espektakulu nomadak baziren ere, gaur egun pornografia edo sexu espektakuluak erakusteko erabiltzen da. Espektakuluok, edo pornografia, zulo txiki batetik ikusten dira.

Historia

Peep showak, edo "berezitasun erakusketak", XV. mendetik aurrera izan dira Europa osoan zehar, eta hainbat kulturatan ezagunak dira. XVII. mendean egindako koadro batek jada erakusten du perspektiba kutxa baten irudia. Peep showa egiteko, nahikoa zen zurezko kutxa bat, zulo bakar batekin edo hainbat zulorekin. Barruko irudiak mugi zitezkeen, kanpoan jarritako hainbat soka eta mekanismorekin. Irudiak ikusten ziren bitartean, ipuin bat kontatzen zen, istorioa lagundu eta dramatizazioa gehitzeko.

XIX. mendeko Txinan hainbat izen ematen zitzaion espektakulu horri. Horietako bat la yang p'ien zen ("atzerriko irudiak mugitzea"). Batzuetan ipuin-kontalariak txontxongiloak edo irudiak erabiltzen zituen kutxatik kanpo, eta ondoren dirua kobratu kutxaren barruan ikusteagatik. Otomandar Sirian sanduk al-ajayib ("mirarien kutxa") izeneko espektakulua mugitzen zen herriz herri. Kutxak sei zulo zituen eta jendeak irudiak ikus zitzakeen erdian zegoen kandela bati esker. Kondairak albisteen gainean izan zitezkeen, edo zerua eta infernuari buruzkoak. Beste gai ohiko batzuk animalia exotikoak ikustea, irudi klasikoak, gorteko zeremoniak edo transformazioak ziren (adibidez, aingerua hasieran, deabrua ondoren).

"Berezitasun erakusketa" horiek XIX. mendean zehar jostailu antzerkien aurrekariak izan ziren, mugitzen ziren eskena eta paperezko figurekin.

Pornografia

Peep show horiek irudi erotiko eta pornografikoak erakusteko ere erabili ziren, adibidez What the Butler Saw izenekoa, XX. mendearen hasieran.

Egun, hala ere, peep showa film pornografiko edo sexu espektakulu bat izaten da, zulo txiki batetik ikusten dena. Zuloa estali egiten da ordaindu den denbora agortutakoan.

Kanpo estekak

Datuak: Q27410
Multimedia: Peep shows / Q27410