Salburuko parkea

Salburuko parkea
Salburuko parkea
	IV. maila: habitat/espezieen kontserbazio gune
Mota	naturagune babestua eta hezegune
Geografia
Koordenatuak	42°51′31″N 2°38′24″W / 42.85854°N 2.63987°W
Honen parte da	Gasteizko Eraztun Berdea
Herrialdea	Euskal Herria
Probintzia	Araba
Arabako eskualdea	Gasteizko kuadrilla
Udalerria	Gasteiz

Salburuko parkea Gasteizko ekialdean dagoen hezegune bat da. Parke hau Gasteizko Eraztun Berdearen harribitxia da, bai bere balio ekologikoagatik bai denboran zehar izan duen bilakaeragatik. Parkea osatzeko lehen lanak 1994. urtean egin ziren, eta oraindik ere garatze prozesuan dago. 2007an parkeak 216 hektarea zituen, Salburuko auzoaren eta Arkautiko Ertzaintzaren akademiaren artean.

Salburuko parkeko hezegune-sistema lau urmael nagusik osatzen dute egun. Gasteiztik hurbilen dagoena Betoñuko urmaela da; ekialderago Arkautiko urmaela dago; bi hauen artean, iparraldean, Larregana deiturikoa dago, eta Betoñukoaren alboan Durantzarra izenekoa.

Historia

Salburuko parkea Arabako Lautadaren azpian dagoen akuifero kuaternarioak gainezka egiten duen tokietako bat da. XIX. mendean hezegunea lehortzeko lanak egin ziren, lurrak nekazaritzarako aprobetxatu ahal izateko. "Aintzirako kanala" izeneko ubidea eraiki ondoren, sistema osoa drainatzea lortu zen, Betoñu aldean urpean geratu zen zati txiki bat salbu.

1994an Gasteizko Udalak, Ingurugiro Gaietarako Ikastegiaren eskutik, hezegunea leheneratzea erabaki zuen. Lehenengo Betoñuko urmaela berreskuratu zen, aintzirako kanala itxiz. Geroago Arkautikoa birsortu zen, eta gero gainerako urmaelak. Lanak oraindik egiten ari dira.

Ekosistemak

Hezeguneetako ekosistema urtarrez osaturik egoteaz gain, Salburuak antzina Arabako Lautada estaltzen zuen hariztiaren hondarretako bat dauka. Bestalde, parkearen hegoaldean Gasteizen ospetsuak ziren Salburuko zelaien zati bat ere geratzen da. Ekosistema honen zatirik handiena desagertu egin zen Salburuko auzo berria eraikitzean, 2005. urtean.

Ekipamenduak

Salburuak informazio-puntu bat dauka bisitariak hartu eta parkearen inguruko argibideak emateko. Puntu honetatik Arkautiko urmaelean kokaturik dagoen kamera telegidatu bat maneiatu daiteke parkeko landaredia eta fauna behatzeko. Bestalde, hegaztiak ikusteko bi behatoki daude parkeko leku estrategikoetan. 2008an Salburuko hezeguneen interpretazio-zentroa izango denaren lanak amaitu ziren. Zentro hau, Ataria deitzen dena, 2008an zehar jarriko da abian, eta bertan ingurumen-hezkuntzari, ikerketari eta sentsibilizazioari loturako jarduerak eskainiko dira.