Txikipedia:Radar

Radarra energia-uhinak erabiltzen dituen sistema bat da, objektuak detektatzeko. Urrutiko objektu bat aurki dezake, baita zein azkar mugitzen den jakin ere. Radarra oso erabilgarria da, gauez eta hodei lodien artean ere aurki ditzakeelako objektuak.

Radarrekin 30eko hamarkadan hasi zen lan egiten. 1935ean, Robert Watson-Watt izeneko zientzialari eskoziar batek radar sistema bat garatu zuen. Britainia Handia aireko erasoetatik babesten laguntzeko erabili zen. Bigarren Mundu Gerran (1939-45), radarrak Alemania garaitzen lagundu zien Britainia Handiari, Frantziari eta Estatu Batuei. Geroztik, hobekuntza asko egin dira radarraren teknologian. Gaur egun, ordenagailuek urrutiko objektuei buruzko xehetasun gehiago ematen laguntzen diete radar sistemei.

Nola funtzionatzen du?

Radar sistema transmisore batek, hargailu batek, antena batek eta pantaila batek osatzen dute. Transmisoreak irrati-uhinak sortzen ditu, energia-korronte ikusezinak direnak. Antenak airera bidaltzen ditu uhinak. Uhinek objektu bat jotzen dutenean, islatu edo errebotatu egiten dira antenan.

Ondoren, uhinak hargailura pasatzen dira, eta horrek gizakiok ulertzeko moduko forma bat ematen die. Uhinek itzultzeko zenbat denbora behar duten neurtzean, hartzaileak objektua zein urrun dagoen jakin dezake. Mugitzen ari den objektu bat norantz doan eta zein abiaduratan doan ere adieraz dezake hargailuak. Batzuetan, objektuaren tamaina ere jakin dezake. Hargailuak informazioa pantaila batera bidaltzen du, jendeak ikus dezan.

Zertarako erabiltzen da?

Radarra oso erabilgarria da. Aireportuetan, aire-trafikoaren kontrolatzaileek radarra erabiltzen dute hegazkinak kontrolatzeko eta haien mugimenduak bideratzeko. Itsasontziek eta hegazkinek radarra erabiltzen dute nabigatzeko edota bidea aurkitzeko. Militarrak radarraren beharra izaten dute jo-puntuak aurkitu eta bilatzeko. Meteorologoek ekaitzak aurkitzeko eta eguraldia iragartzen laguntzeko erabiltzen dute. Poliziak, aldiz, radarra erabiltzen du autoen abiadura neurtzeko.