Alessandro Stradella
Alessandro Stradella (Montefestino, 1642 - Genoa, 1682) Italiar musikagilea eta kantaria izan zen. Venezian, Turinen eta Genoan lan egin zuen. Ariaren, oratorioaren eta kantataren aurrerabidean eragin handia izan zuen. Adierazkortasuna zuen lehen kezka, eta garrantzi handia eman zion musika-tresnen lanari. Abenturaz betetako bizitza izan zuen eta maitale ugari. Esan ohi denez, gorabehera haien ondorioz hil zen sastakatuta. Bere bizitza kondaira askotako gai izan zen, eta opera-egile batzuek ere gaitzat hartu zuten (Niedermeyer, Flotow, Schimounek, besteak beste). Operak idatzi zituen: Forza dell´amor paterno (1678), Il trespolo tutore (1679 inguruan); oratorioak, kantatak, moteteak, madrigalak, ariak eta duetoak, eta musika-tresna askotarako lanak.
Erreferentziak[aldatu]
- Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Izan ere, egile-eskubideen jabeak, Eusko Jaurlaritzak, hiztegi horiek Creative Commons Aitortu 3.0 Espainia lizentziarekin argitaratu ditu, Open Data Euskadi webgunean.
