Batken eskualdea

Batken eskualdea
	Kirgizistan
Administrazioa
Estatu burujabe	Kirgizistan
ISO 3166-2	KG-B
Hiriburua	Batken
Geografia
Koordenatuak	40°45′N 70°45′E / 40.75°N 70.75°E
Azalera	16.995 km²
Mugakideak	Ox, Fergana probintzia, Sughd eta Errepublikarekiko mendekotasunpeko barrutiak
Demografia
Biztanleria	400.400 (2005)
Dentsitatea	23,56 bizt/km²
Matrikula	A

Batken (kirgizeraz: Баткен облусу, باتكەن وبلۇسۇ, Batken oblusu; errusieraz: Баткенская область, translit.: Batkenskaya oblast) Kirgizistango zazpi eskualde edo oblastetako bat da. 17.000 kilometro koadroko eremua hartzen du, eta 2021ean 548.247 biztanle zituen.^[1] Hiriburua Batken hiria da. Muga konplexua du, Tajikistan eta Uzbekistango barrendegiekin bere barnean.

Barrendegiak

Sobietar Batasunaren garaian Batken eskualdean sei enklabe eta exklabe sortu ziren. Horietatik bi tajik etniarenak ziren, beste laurak uzbekoak.

Sokh barrutia (edo Soʻx) Uzbekistanen parte da, eta Batkenetik 24 kilometrora dago ekialdean. Barrendegi guztien artean handiena da, 234 kilometro koadrorekin, Trebiñu baino pixka bat txikiagoa. Ekialde-mendebalde zabalera maximoa 13 kilometro da eta iparraldetik hegoaldera 35 kilometro ditu. Batkenetik Oxera doan errepideak zeharkatzen du. Uzbekistanen parte izan arren, tajikoak dira biztanleen %99 inguru^[2].

Chon-Qora eta Qalacha (ez nahastu Qal'acha herriarekin) Sokhetik iparraldera dauden bi herri dira, barrendegi oso txiki baten barnean. 2x1 kilometro neurtzen dituen eremua da, 3 kilometro koadro guztira. Administratiboki, Sokh barrutiaren parte ere bada. Kirgizstanen badu beste herri bat, hortik bi kilometrora, Chong-Kara deitzen dena^[3].

Jani-Ayil (Dzhangail, Jangy-ayyl edo Khalmion ere deitua) Uzbeskitango beste exklabe txiki bat da, Batkendik 60 kilometrora ekialdean eta Uzbekistango mugatik kilometro batera.

Shohimardon edo Shakhimardan Uzbekistango laugarren barrendegia da, Batkendik 80 kilometrora ekialdean eta mugatik 19 kilometrora hegoaldean. 38,2 kilometro koadro ditu eta 5.100 biztanle inguru, %91 uzbekoak.

Tajikistanek bi barrendegi ditu Batken barruan. Lolazor da txikiena, Kayragach herri kirgizetik gertu, eta Batkendik 130 kilometrora mendebaldean. Kirgizistan-Tajikistan mugatik oso gertu dago, eta mugaren beste aldean Qal'acha herria dagoenez, maiz "Mendebaldeko Qal'acha" deitzen zaio.

Azken barrendegia Vorukh da, Tajikistanek Kirgizistan barruan duen 96,7 kilometro koadroko eremua, Isfaratik 45 kilometro hegoaldera eta Batkendik 24 kilometro hego-mendebaldera, Karavshin ibaiaren eskumako aldean. 17 herrixka daude barruan, eta 23.000-29.000 biztanle inguru ditu, %95 tajikak.