Gaztezulo

Wikipedia, Entziklopedia askea
Hona jauzi: nabigazioa, Bilatu
Gaztezulo
Mota Gazteentzako hilabetekaria
Lehen zenbakia 1999
Banatze lurraldea Euskal Herria
Argitaratze hiria Donostia
Hizkuntza Euskara
Argitaratzea Bagera
Salneurria 22 € urteko harpidetza (2017)
Kolorea Koloretan
Argitaletxea Donostiako Komunikabideak
Zuzendaria Zuriñe Maguregi
ISSN 1575-7889
gaztezulo.eus

Gaztezulo Donostian sortu zen 1999an. BAGERAren, Donostiako euskara elkartearen, Irutxulo aldizkariaren altzoan. Orduan "Gaztetxulo" izena zuen, eta hutsune bat bete nahi zuen. Izan ere, musikari buruzko aldizkari bat, eta egunkarietako gehigarri bat edo beste kenduta, ezer gutxi zegoen, prentsa arloan eta euskaraz, gazteentzat: gazteek ez zuten gai orokorrak, mota guztietako gaiak, lantzen zituen aldizkaririk. Helburu horrekin, lehendabizi, urtebete egin zuen Donostian bakarrik.

Euskal Herri osoan ere hutsune bera zegoela ikusita, saltoa eman zuen ondorengo urtean, 2000ko urrian, eta zazpi herrialdeetan banatzen hasi zen. Orduz geroztik, Donostiako harekin alderatuta, aldizkari mardulagoa da, Euskal Herri osoko gaiak lantzen ditu eta, harpidetza bidez ez ezik, Euskal Herriko kiosko askotan eskuragarri dago.

Iraultzarik handiena 2007an iritsi zen: Gaztetxulok izena aldatu zuen, (Gaztezulo bihurtu zen), diseinua ere zeharo aldatu zuen eta webgunea sortu zen: gaztezulo.com. Hura sekulako aldaketa izan zen. Batetik, aldizkariak diseinu modernoagoa eta ausartagoa ekarri zuelako. Bestetik, sektorerik gazteenak ahaztu gabe, beste batzuetara (25-26 urtetik gorakoetara, adibidez) begira jarri zelako. Eta azkenik, eta batez ere, internet munduan murgildu zelako.

Gaur egun, Gaztezulo ez da hilabetekari hutsa: komunikazio proiektu osoa izan nahi du. Eta helburu horretan, sarea ezinbesteko tresna da. Hari esker, gazteekin harremanetan dago, gazteek beraiek haien artean jar daitezke harremanetan, mota guztietako informazioak eskuratu eta zalantzak argitu ditzakete... gaztezulo.eus ez da aldizkariaren osagarri: nortasun propioa du eta proiektuaren zutabeetako bat da. Gainera hortxe dago ere Gaztezuloflash astekari elektronikoa.

2010ean aldizkariaren 10. urteurrena zela eta ale berezia (111. zkia.) argitaratu zuen; urtebetetzearen harira Gaztezulo Saria banatzeari ekin zioten[1]; lehen saria Gorka Urbizuk jaso zuen. Urte horretan aldizkariak bost lagunek osatutako lan taldea eta 7.000 harpidedun zituen; 16.000 ale inguru banatzen zituen hilero.

2011n prentsa idatziaren Argia Saria eman zioten[2].

2015 urteko hasieratik webgunearen helbidea Gaztezulo.eus da.

Erreferentziak[aldatu | aldatu iturburu kodea]

Ikus, gainera[aldatu | aldatu iturburu kodea]

Kanpo loturak[aldatu | aldatu iturburu kodea]


Euskal Herria Artikulu hau Euskal Herriko kulturari buruzko zirriborroa da. Wikipedia lagun dezakezu edukia osatuz.