Bego Alabazan

Bego Alabazan
	;
Bizitza
Jaiotza	Bilbo, 1966ko otsailaren 19a (58 urte)
Herrialdea	Bizkaia, Euskal Herria
Hezkuntza
Heziketa	Deustuko Unibertsitatea
Hizkuntzak	euskara; gaztelania
Jarduerak
Jarduerak	ipuin-kontalaria, irakaslea eta aktorea

Begoña Gómez Abrisketa (Bilbo, Bizkaia, 1966ko otsailaren 19a) Bego Alabazan izen artistikoa duena, ipuin-kontalaria da. Ahozko narrazioan egindako lanagatik da ezaguna.

Biografia[aldatu | aldatu iturburu kodea]

Bego Alabazan Bilbon jaio zen 1966an. Euskal Filologian lizentziaduna da Deustuko Unibertsitatean, eta Irakurketa eta Haur Literatura Sustatzeko III. Masterra eta hainbat ikastaro egin ditu ahozko narrazioarekin lotuta.^[1] Urteak eman zituen helduei euskara irakasten eta ipuinak kontatzen, eta azkenean barrutik gehien betetzen zuena aukeratu zuen: ipuinak kontatzea, hain zuzen ere.^[2]

Ibilbide artistikoa[aldatu | aldatu iturburu kodea]

Alabazani txikitatik gustatzen zitzaion kontatzen zitzaizkion istorioekin jolastea. Horrela, besteak beste, txotxongiloak, marrazkiak eta muralak erabiltzen zituen lagungarri berak gero beste pertsona batzuei kontatzeko. Hori horrela, 1996. urtean “Kandelen argipean” izeneko ahozko narrazioko taldea sortu zuen beste hiru kiderekin batera, eta harrezkero ipuinen munduan murgildu zen.^[2]

1997tik 2012ra bitartean Eusko Jaurlaritzaren Hezkuntza Sailak antolaturiko ACEX izeneko egitarauan parte hartu zuen Euskal Herriko eskoletako liburutegiak sustatzen; eta baita ere Algortako liburutegian oso errotuta dagoen “Kontularien Kluba” eta Bilboko Topalekuko “Cuarto de Contadores” martxan jartzen lagundu zuen 2003-2007 bitartean.^[3]

1998tik 2009ra arte “Kandelen Argipean” taldean Bilboko BilboRocken helduentzako ipuin-saioen egitaraua bideratzen lagundu zuen, eta 2006ko lehen ediziotik 2012ra arte, urtero hartu zuen parte Euskal Herriko Elkarteak antolatutako “Bazen behin…” festan.^[3]

Pedro Alabazan (Pedro Ruiz) taldekidearekin batera “Elkarrekin liburu bat sortuko dugu?” tailerra bideratzen du, eta horrela neska-mutilak ipuinak sortzen lagundu eta beraiek egindako irudiekin batera ipuin-liburuak argitaratzen dituzte. Tailer hau Barakaldoko Udalaren HitzBatu izeneko egitarauaren barruan 2006tik aurrera bideratzen dute, baita Bilboko eta Gasteizko hainbat ikastetxetan ere.^[3]

2011an “Alabazan” izeneko konpainia txikia sortu zuen Pedro Ruizekin batera, eta bestelako lanen artean, 2013tik 2019ra, Bilboko Udaleko “Istorio BIziak-Cuentos encadenaDOS”, narrazioaren inguruko hainbat jarduerekin osatutako jaialdia ere kudeatu zuen.^[2]

2017an Bilboko Aminata Ipuin Jaialdia antolatzen lagundu zuen. Lan desinteresatu horri lotuta, 2019ko azaroan Senegalgo Aminata Kultur Zentrora gonbidatu zuten, prestakuntza-ikastaroak emateko eta ipuin-saioak egiteko.^[4]

2020an, “La Nobleza de Bereterretxe”/"Bereterretxeren Noblezia" liburua autoargitaratu zuen, gaztelaniaz eta euskaraz, publiko helduari zuzendutako “Bereterretxeren Kanthoria” ahozko narrazio saioan oinarritua.^[4]^[5]

2018tik aurrera, Lope García de Salazar banderizoaren bizitzari buruzko “Muñatoneseko Azpi Jokuak” obran antzezten du, ahaide nagusi honen bizitzan garrantzitsuak izan ziren hiru emakumeri ahotsa eta bizitza ematen, Pobaleko Burdinola-Bizkaiko Foru Aldundiak antolatuta.^[4]