Fotoarnasketa

Wikipedia(e)tik
Hona jo: nabigazioa, Bilatu
Fotoarnasketa

Fotoarnasketa, C3 landareek, argipean eta oxigeno kontzentrazioa handia izateagatik Calvin zikloko RuBisCO entzimak oxidasa jardueraz aritzen denean, hartzen duten bide metabolikoa da. Horren ondorioz oxigenoa kontsumitu, metabolitoak oxidatu eta azkenik karbono dioxidoa askatzen bada ere, ez du zerikusirik arnasketa zelularrarekin, ez baita fosforilaziorik gertatzen besteak beste. Prozesu hau ingurune lehor eta beroetan gertatzen da, hostoen estomak ur-galerak ekiditeko ixten direnean.

Oxigenoa kontsumitu eta CO2 sortzen du. Landarearen kloroplasto, peroxisoma eta mitokondrioetan burutzen da.

Fotoarnasketa fotosintesiarekin batera burutzen da; biek ala biek argia behar dutelako. Hala ere, prozesu metaboliko desberdinak dira: fotosintesiak CO2 kontsumitu eta O2 askatzen duen bitartean, fotoarnasketak oxigenoa kontsumitu eta CO2 sortzen du. Ohiko arnasketarekin alderatuta, aldiz, fotoarnasketak energia galtzen du, ez du ATP-rik sortzen.

Fotoarnasketaren hasierako metabolitoa Calvin zikloan ere parte hartzen duen erribulosa 1,5 difosfatoa da. Oxigenoarekin erreakzionatzerakoan fosfoglikolatoa eta 3-fosfoglizerikoa sortzen du:

Erribulosa 1,5 difosfatoa + O2 → fosfoglikolatoa + 3Pglizerikoa

Kloroplastoetan burutzen da hasierako erreakzio hau.

Gero, fosfoglikolatoa kloroplastotik atera eta peroxisometan sartzen da; bertan eta baita mitokondrioetan ere bide metaboliko konplexua burutzen du, glizina eta serina aminoazidoak agertuz eta CO2 eta amoniakoa askatuz.

Fotoarnasketak fotosintesiaren errendimendua murrizten du (%50era jaitsiz). Erribulosa 1,5 difosfatoa kontsumitzen duenez, Calvin zikloa moteltzen du eta baita horren bidez burutzen den karbonoaren asimilazioa ere.

Karbono dioxidoaren kontzentrazio txikiek fotoarnasketa indartzen dute.

Ikus, gainera[aldatu | aldatu iturburu kodea]