Kabiar

Beluga kabiarra.

Kabiarra (persieraz: خاویار, Khāviār) gaizkataren arraba gazituekin egindako kontserba da. Hoberenak Itsaso Beltzekoak eta Kaspiarrekoak dira (Beluga, Ossetra eta Sevruga). Mota hauek, kalitatearen (dasta, neurria, trinkotasuna eta kolorea) arabera, kilogramoko 7.000 € eta 12.000 € arteko prezio izatera irits daitezke (2011n) eta gourmet eta goi sukaldaritzari lotutako kutixiak dira.

Kabiar motak

• Beluga kabiarra: Kaspiar itsasoan bizi den Huso huso espeziearen kabiarra. Urriena eta ospetsuena da. Arraba grisak eta handiak, ilarraren neurrikoak.
• Ossetra kabiarra: Acipenser gueldenstaedtii eta Acipenser persicus espeziena. Arrabak belugarenak baino txikiagoak eta argiagoak dira.
• Sevruga kabiarra: Acipenser stellatusen arrabak.
• Almas kabiarra (errusieraz, алмаз izenak «diamantea» esan nahi du): kabiar hori argia da, Huso huso albinoen arrabekin egindakoa. Munduko garestiena da: 18.000- 29.000 €/kg (2009an).
• Haztegietako kabiarra: Acipenser baerii (Ossetraren antzeko zaporea), Acipenser transmontanus (Sevrugaren antzeko zaporea), Acipenser gueldenstaedtii (Bulgaria, Txina eta Israelen hazten da) eta Acipenser nacarii (Granadan hazten da) espezieak erabiltzen dira.

Beste arrain batzuen arrabak, izokin, zikloptero edo korrokoienak esate baterako, kabiarraren ordezkoak egiteko erabiltzen dira.

Ikus, gainera

• Kalixeko kabiarra

Kanpo loturak

• Joana MENDIBURU: «Hurbileko kabiarra, ezezaguna eta urria», 7K, 2002-12-01.