Bad Religion

Bad Religion
Datuak
Jatorria	Woodland Hills (Kalifornia, Estatu Batuak)
Musika mota	Hardcore, Punk, Rock
Sortze urtea (eta desegitearena, desegin bada)	1979 -
Produkzioa
Diskoetxea(k)	Epitaph; Atlantic
Taldekideak
	Greg Graffin; Mr. Brett; Greg Hetson; Brian Baker; Brooks Wackerman; Jay Bentley
Lehengo taldekideak
	Jay Ziskrout; Davy Goldman; Tim Gallegos; Pete Finestone; John Albert; Lucky Lehrer; Bobby Schayer;
Informazio gehigarria
	www.badreligion.com

Bad Religion 1979. urtean Kalifornian sortutako hardcore eta punk rock taldea da, aditu askoren iritziz, hardcore melodikoaren aitzindariak.

Taldekideak

Greg Graffin - Ahotsa (1979-Gaur egun)
Mr. Brett - Gitarra (1979-1983, 1985-1994, 2001-Gaur egun)
Greg Hetson - Gitarra (1984-Gaur egun)
Brian Baker - Gitarra (1994-Gaur egun)
Jay Bentley - Bajua (1979-1982, 1986-Gaur egun)
Brooks Wackerman - Bateria ([[2001]-Gaur egun)

Lehenagoko taldekideak

Paul Dedona - Baxua (1982-1984)
Tim Gallegos - Baxua (1984-1985)
Jay Ziskrout - Bateria (1979-1981)
Pete Finestone - Bateria (1981-1982, 1984, 1986-1991)
Davy Goldman - Bateria (1982-1984)
Lucky Leher - Bateria (1986)
Bobby Schayer - Bateria (1991-2001)

Historia

Hastapenak

1970eko hamarkadaren amaieran, Greg Graffin (ahotsa), Jay Ziskrout (bateria), Brett Gurewitz (gitarra) eta Jay Bentleyk (baxua) punk talde bat sortzea erabaki zuten. Garai hartan, Black Flag, The Adolescents edota The Germs taldeak oso gustuko zituzten, eta antzeko musika egitea otu zitzaien: kontzertuak emateko eta diskoak ekoitzi ahal izateko zeuden arazoengatik, Brett Gurewitzek (Mr. Brett ezizenaz ere ezaguna) diskoetxe bat sortzea erabaki zuen. Horren bidez, Bad Religionen diskoez gain, beste talde hasiberri askori ere aukera eman nahi zion. Horrela, Epitaph izeneko diskoetxea sortu zuen. Ondoren, taldeak lehen EPa argitaratu zuen (Bad Religion), 1981ean kaleratua.

Segidan, estudioko lehen lana kaleratu zuten (How Could Hell Be Any Worse?). Lan horretan, Greg Hetsonen gitarra-jotzailearen laguntza jaso zuten. Momentu horretan, Hetson Circle Jerks taldeko gitarra-jotzailea zen, baina gero bi taldeetako partaide izan zen. Disko horren grabazioan, beren ibilbidean gertatu diren formazio aldaketak hasi ziren. Jay Ziskroutek, zortzi kanta grabatuak zituela, taldea utzi zuen eta haren ordez, Pete Finestone sartu zen. Diska horrek oso harrera ona izan zuen, 10.000 kopia baino gehiago saldu baitzituen.

1983. urtean, sintetizagailu eta teklatuen bidez, soinu berriak sartzen hasi ziren beraien musikan, soinu progresiboagoa lortzeko. Soinua aldatzeaz gain, beraien bigarren diskoa ere argitaratu zuten (Into the Uknown). Baina jarraitzaileei ez zitzaien soinu aldaketa hori asko gustatu eta taldea eta diskoa oso kritikatuak izan ziren. Horrez gain, taldearen formazioa berriro ere aldatu zen: Finestonek bateria jotzeari utzi zion eta haren ordez Davy Goldman sartu zen. Jay Bentleyk ere taldea utzi zuen eta Paul Dedonak haurren ordez baxua hartu zuen.

Bad Religionen barruan ere lehen arazoak sortu ziren urte horretan: taldearen lehen geldiunea ekarri zuen. 1984ean, Mr. Brett joan zen, drogekin zituen arazoengatik. Ordezkoa Hetson izan zen. Hark Greg Graffinekin hitz egin zuen, berriz ere estudioan sartzeko. Horrela, Back to the Known EPa plazaratu zuten. Bertan, Tim Gallegosek baxua jo zuen Dedonaren partez eta Finestone taldera itzuli zen, bateria jotzeko. 1984 eta 1988 urte bitartean, ez zuten disko berririk grabatu, baina formazio aldaketak izan ziren berriz ere. Lehenik, Finestonek taldea utzi zuen eta haren ordez, John Albert sartu. Geroago, Lucky Lehrer hasi zen bateria jotzen, Alberten ordez.

Lehen arrakastak

1986. urtean, Bentley, Finestone eta Gurewitz taldera itzuli ziren, estudioko hirugarren diskoa kaleratzeko (Suffer), 1988an argitaratua, Epitaphen laguntzaz: taldearen lehen arrakasta izan zen. Kaliforniako 1980ko hamarkadako punk mugimenduan inflexio puntua izan zen. Diskoak folk melodiak eta punka nahasten zituen eta estilo mota berri hori talde askok imitatu zuten aurrerago. Ondoren, No Control eta Against the Grain diskoak etorri ziren 1989an eta 1990ean. Hiru diskookin, taldea punk rock talderik esanguratsuena bilakatu zen. 1992an, Generator diskoa kaleratu zuten: bertako kantak landuagoak eta luzeagoak izan ziren. Finestonek taldea utzi zuen berriz ere; ordezkoa Bobby Schayer izan zen.

1993an Recipe for Hate zazpigarren albuma kaleratu zuten, momentuz Epitaph diskoetxearekin kaleratu duten azkena. Hala ere, anitz jarraitzalek asko kritikatu zuten taldea, urte horretan Atlantic bezalako diskoetxe multinazional batera pasa zirelako. Urte hartan halaber, kanta bat grabatu zuen (Leaders and Followers) Clerks filmerako.

Gurewitzetik aldentzea

1994a urte oso mugitua izan zuten. Stranger Than Fiction diskoa kaleratu zuten, punk rock diskorik biribilenetakoa. Gurewitz estudioan grabatu zuten azken diskoa izan zen. Gurewitzek Epitaph diskoetxearekin lan egitea soilik erabaki zuen eta horregatik utzi zuen taldea. Urte horietan, Epitaph oso ezaguna egin zen, batik bat Offspring taldearen Smash diskoaren arrakastagatik. Bad Religionen jarraitzaileek ez zioten barkatu taldea utzi izana eta saldutzat jo zuten. Mr. Bretten ordez, Brian Baker sartu zen gitarra jotzeko: anitz taldetan ibilitakoa zen, hala nola Minor Threat edota Dag Nastyn. Horrez gain, Epitaphek All Ages bilduma diskoa kaleratu zuen 1995ean. Horrek, Gurewitzen eta Bad Religiongo taldekideen harremana okertu egin zuen.

Gurewitzetik joateak eragin nabarmena izan zuen taldearengan, sorkuntza alorrean gehienbat. 1996an The Gray Race diskoa kaleratu zuten, salmenta oso xumeak izan zituena. Horrekin batera, izugarrizko bira mundiala burutu zuten. Amaitutakoan, Tested zuzeneko diskoa kaleratu zuten 1997an. Epic diskoetxearekin kaleratu zuten. Handik urtebetera, No Substance diskoa kaleratu zuten, beren hamargarrena.

1990eko hamarkada amaieran, The New America diskoa kaleratu zuten, hasierako arrakastak berreskuratuz. Disko horrekin batera, Gurewitzekiko harremana hobetzen joan zen, Gurewitzek kantu batean partehartzeraino. Disko hori Atlantic zigiluarekin kaleratu zuten azkena izan zen.

2001ean, berriz ere Epitaph diskoetxearekin hasi ziren lanean eta Bobby Schayerrek taldea eta musika mundua utzi zuen, arazo fisikoen ondorioz. Haren ordez, Suicidal Tendencies, Infectious Grooves edota The Vandals taldeetan ibilitako Brooks Wackerman hasi zen bateria jotzen. 2002an The Process of Belief diskoa kaleratu zuten, Epitaph diskoetxearekin eta Mr. Brett-en laguntzaz.

2004ean The Empire Strikes First diskoa argitaratu eta bira bat egin zuten Estatu Batuetan, Rise Against eta Pennywise taldeekin.

2006. urtean, lehen DVDa kaleratu zuten, Live at the Palladium. Bertan Hollywoodeko Palladium aretoan izandako bi kontzertutako irudiak, taldekideei elkarrizketak eta argazkiak daude. Handik urtebetera, New Maps of Hell diskoa kaleratu zuten, estudioko hamalaugarrena.

Diskografia

Bideoak eta DVDak

Kanpo estekak

(Ingelesez) Bad Religion taldearen webgunea

Datuak: Q201669
Multimedia: Bad Religion / Q201669