Buztanzuri hori

Buztanzuri hori
	Irudi gehiago
Iraute egoera
	; Arrisku txikia (IUCN 3.1)
Sailkapen zientifikoa
Klasea	Aves
Ordena	Passeriformes
Familia	Muscicapidae
Generoa	Oenanthe
Espeziea	Oenanthe hispanica; Linnaeus, 1758
Banaketa mapa
Kumaldiaren tamaina	4,5
Errute denbora	13 egun

Buztanzuri horia (Oenanthe hispanica) muscicapidae familiako hegazti paseriformea da, Mediterraneo inguruan bizi dena^[1].

Deskribapena

Buztanzuri arruntaren tamaina, portaera eta itxura bera du. Bere jantziaren diseinua ere oso antzekoa da: ipurtxuntxur zuri-beltza du eta marrazki bera eta bere kidekoaren buztan eta hego beltzak, hankak eta mokoa beltz bizi kolorekoak.

Desberdintasun nabarmenena grisaren erabateko falta da. Bizkarraldea okre-gorrixka du, buruan biziagoa eta azpiko zatiak, okre-zuria du sabelean, hau nabarmentzen doa bularrean okre-gorrixka bizia lortu arte. Ar batzuek buztanzuri grisaren antzeko maskara beltza dute, baina beste batzuetan orban beltza zabalagoa da, eztarri osoan zehar adur-zapi bat bezala hedatzen da. Arren arteko dimorfismo hori espezie honen tipikoa da.

Buztanzuri grisarekin gertatzen den bezala, arren eta emeen neguko lumajea lausotuagoa da. Beltzak arre ilun bihurtzen dira eta maskara asko desagertzen da eta, ipurtxuntxurrean eta isatsean eredu bera mantentzen badute ere, zuria zikinagoa da eta beltzak tonu lausoa du.^[2]

Biologia eta ohiturak

Izaera, jarrera eta ohiturei dagokienez, oro har buztanzuri arruntaren espezierako esandako guztia errepika genezake. Migrazio-ohitura berdinak, elikadura intsektiboro mota bera eta lurreko bizimodua. Beharbada, sastraka eta zuhaixketan pausatzeko joera handiagoa dute, ziurrenik buztanzuri arruntek gustuko dituen habitat motan ugariagoak izan ohi direlako. Aldiz, fidagarriagoa da, ez hain iheskorra.

Ugalketaren biologia ere antzekoa da bi buztanzurietan, badirudi bigarren erruteen proportzioa buztanzuri horietan zertxobait handiagoa dela, baliteke klima-eremu epelagoetara mugatuta, udaberri goiztiarraz eta uda luzeagoez gozatzeko aukera dutelako izatea.

Banaketa, habitata eta egoera

Mediterraneoko fauna motakoa, buztanzuri horiak ia itsaso honen sestrara mugatua du hedapen-eremua; Iberiar penintsulatik, Europa hegoalde osoan, Itsaso Beltzaren mendebaldeko ertzera arte, Ipar Afrika Maroko eta Tunisia artean eta gero Asia Txikian eta Armenian Iranera arte. Iberian ohikoa da Mediterraneoko eremuan, urri bihurtzen da iparraldeko azpi-ordokian eta ez dago, edo oso arraroa eta lokala Kantaurialdean.

Populazio txiki bat iristen da gure lurraldera, non, bere eskakizun ekologikoen muga-baldintzak aurkitzen dituen. Arabako Errioxako zenbait lekutan ugaltzen da, baina ez Toloño-Kantabria mendilerroaren mugatik iparraldera.Hala ere, mendilerro horretatik iparraldera eta Conchas de Harotik ibaian gora ikusten dira ale batzuk, baina normalean behintzat ugaltzen ez diren hegazti alderraiak izan behar dute^[3]. Nafarroan, hegoalde mediterraneoan bizi da, Erribera aldean batez ere, baina Lizarrerriraino eta Iruñerriraino hedatzen da haren banaketa^[4].

Buztanzuri horia, Euskal Herriko hego-ekialdeko eremura mugatzen da, lur-zati mediterraneoenean, baina ez buztanzuri arruntaren presentzia baztertzeko beste, hori dela eta, biak daude eremu hauetan.

Eremu horren barruan, ikus daiteke, dagoeneko hainbat autorek adierazi dutenez, bi espezieek aukeratzen dituzten habitat-motak nabarmen desberdinak direla. Buztanzuri horiari ez zaio axola edo nahiago ditu, lur hautsiak eta estalki belarkara urria dutenak, esate baterako, sastrakak sakabanatuta dituzten belardi xerofilo pobreak, ez belar alfonbra trinkoak, buztanzuri arruntak aukeratzen duen moduan, altuera jakin bateko sastraka eta zuhaixken estaldura ere onartzen du, betiere lurreko espazio libre nahikoa uzten badute.

Arabako Errioxan, mahastiak eta muino idorrak okupatzen ditu, erromero-abaritz, txapar eta almendra eta oliba landaketa batzuekin daudenak. Artadi degradatuen soilgune eta ertzetan aurkitzen da, Nabaridasen bezala eta Barranco de Dueñas-eko P. halepensis pinudiaren ordez agertu den sastrakadietan bezala.

Erreferentziak

↑ Svensson, Lars; Peter J. Grant (1999). Collins Bird Guide. Londres: HarperCollins
↑ (Gaztelaniaz) Administracion de la Comunidad Autonoma de Euskadi. (1989). Euskal Autonomiu Elkarteko Ornodunak. Graficas Santamaria S.A., 245 or. ISBN 84-7542-639-5..
↑ (Gaztelaniaz) Euskadiko Hegazti habiagileen atlasa. Donostia: Aranzadi ISBN 978-84-17713-87-4..
↑ (Gaztelaniaz) Elósegui Aldasoro, Jesús. (1985). Atlas de aves nidificantes de Navarra. Iruñea: Caja de Ahorros de Navarra ISBN 84-505-1248-4..

Artikulu hau biologiari buruzko zirriborroa da. Wikipedia lagun dezakezu edukia osatuz.

Datuak: Q385723
Multimedia: Oenanthe hispanica / Q385723
Espezieak: Oenanthe hispanica

[1] Svensson, Lars; Peter J. Grant (1999). Collins Bird Guide. Londres: HarperCollins

[2] (Gaztelaniaz) Administracion de la Comunidad Autonoma de Euskadi. (1989). Euskal Autonomiu Elkarteko Ornodunak. Graficas Santamaria S.A., 245 or. ISBN 84-7542-639-5..

[3] (Gaztelaniaz) Euskadiko Hegazti habiagileen atlasa. Donostia: Aranzadi ISBN 978-84-17713-87-4..

[4] (Gaztelaniaz) Elósegui Aldasoro, Jesús. (1985). Atlas de aves nidificantes de Navarra. Iruñea: Caja de Ahorros de Navarra ISBN 84-505-1248-4..

[1]

[2]

[3]

[4]