Euskal Kultur Erakundea
Euskal Kultur Erakundea edo EKE (frantsesez: Institut Culturel Basque) euskal kulturaren aldeko Ipar Euskal Herriko irabazteko asmorik gabeko erakunde bat da, 1990ean erakunde publikoen diru laguntzaz sortua. Diruz laguntzen dute Frantziako Kultura Ministerioak, Akitania eskualdeak eta 146 herri biltzen dituen euskal kulturaren aldeko herriarteko sindikatak.[1][2]
Bere egoitza Uztaritzeko Lota jauregian du. 2012an, bederatzi langile profesional ditu. Pantxoa Etxegoin da zuzendaria, eta Mikel Erramouspe da administrazio-kontseiluko lehendakaria.
Urtero eta Pazko egunez, Sara udalerrian, bertako Turismo Bulegoarekin batera Euskal Herriko Idazleen Biltzarra antolatzen du.
Helburuak
Hauexek dira helburu nagusi ofizialak:
- euskara eta euskal kultura suspertzea.
- alor guzietan goi-mailako ikerketak eta kultura trukaketak egitea.
- euskal kulturari laguntza aktiboa ematea arlo anitzetan: euskararen sustapena, literatura, antzerkia, bertsolaritza, ikus-entzunezkoak, dantza, musika, arte plastikoak, ondarea, euskal kirolak...
Teorian lehentasuna ematen die euskaraz burutzen diren ekintzei, direla EKEk berak antolatuak direla elkarteek proposatu eta erakunde honek babestu edo kudeatuak.
Administrazio-kontseilua eta kideak
Lehendakariaz gain, kide hauek ditu administrazio-kontseiluak:
- Erakunde publikoak: 3 frantses estatutik, prefeta barne; 2 Akitania eskualdetik (Jean Lizar eta Frantxua Maitia); 2 departamentutik (Kotte Ezenarro eta Max Brisson); azken lau hauek kargu politikoak dira.
- Euskal kulturaren aldeko Herriarteko Sindikataren partetik: 2 lagun, Herriko Etxeetako arduradunak direnak.
- Euskal kulturaren arloan diharduten elkarteetatik: 8 kide.
- "Pertsona kualifikatu"tzat jotzen direnak: 4 kide; egun erakundeko lehendakaria denaz gain, Xabier Itzaina unibertsitate irakaslea, Jean Louis Davant idazle eta euskaltzaina, eta Eusko Jaurlaritzako ordezkaria.
Kidetzat hartu diren elkarteak 145 dira.[3] Kultura arlo guztietako elkarteak dira, Ipar Euskal Herrikoak nahiz diasporakoak.
Erreferentziak
- ↑ «Euskal Kultura Erakundea», Euskal Kultur Erakundearen webguneko orria.
- ↑ (Frantsesez) Euskal Kultur Erakundearen estatutuak.
- ↑ EKEko kideen zerrenda
Bibliografia
- Antton Luku, Euskal kultura?, Iruñea, Pamiela, 2009. Saiakera saritu honetan antzerkiegileak Ipar Euskal Herriko kulturaren panoramaren deskribapen ironikoa egiten du, EKEren lanarena barne delarik.