Mentxu Alkorta

Wikipedia, Entziklopedia askea
Mentxu Alkorta
Bizitza
Jaiotza Donostia, 1947
Herrialdea  Gipuzkoa, Euskal Herria
Heriotza Errezu2021eko urtarrila (73/74 urte)
Jarduerak
Jarduerak dantzaria, Trikitia eta dantza irakaslea

Mentxu Alkorta Arzak (Donostia, Gipuzkoa, 1947-Errezu, Nafarroa Garaia, 2021eko urtarrilaren 24a) dantzari profesionala eta trikikilaria izan zen.[1]

Biografia[aldatu | aldatu iturburu kodea]

Dantza klasikoan formatu zen eta ostean Anexa Euskal Herriko lehenengo dantza garaikide konpainiako kide izan zen. Dantza garaikidean dantzari profesionala izan zen. Anexa konpainia desegin zenean dantza akademia zabaldu zuen Oiartzunen eta irakasle jardun zuen urteetan. Akademia hartan hainbat dantza diziplina lantzen ziren: garaikidea, klaketa, foxtrota, swinga, tangoa zein balsa. Jardunaldiak ere antolatzen zituzten, urtean behin kanpoko dantzariak gonbidatuta. Maiatza Dantzan jaialdiaren lehen urratsak Alkorta buru zen taldeak eman zituen Oiartzunen. Jaialdiaren bidez Europako dantza garaikidearen tendentzia berriak ezagutzera eman nahi izan ziren.[2]

Dantzan ez ezik, musikan ere formatu zen Mentxu. Hemezortzi urterekin pianoko karrera egin zuen, gero akordeoi handiarekin hasi zen, eta hogeita hamar bat urterekin, trikitiaren mundura heldu zen. Urteetan trikiti bikote izan zen Gema Sisitiagarekin. 1986an dantzari esker batu eta Oiartzungo trikitilari zaharren aztarnak bilatzeari ekin zioten. Horien doinuak jaso eta moldatu egin zituzten, gero herriz herri jotzeko.[3] Lehenengotako emakume bikotea izan zen Euskal Herriko trikitiaren historian.[4]

Mentxuren aitona ere soinujolea izan zen, familiatik zetorkion beraz trikitiarekiko lotura. Urteetan plazarik plaza ibili zen Alkorta, aitonarena izandako soinuarekin, Sistiaga lagun hartuta. 2012an disko batean ere parte hartu zuten. Euskal Herriko Trikitixa Elkarteak trikiti pieza zaharrak berreskuratzeko helburuz argitaratzen duen Faborez bildumarako grabatu zuten.[5]

Trikitiaren jaialdi batean Mentxu Alkortaren eta Mertxe Olidenen ahotsek txalo zaparradak eragin zituzten, buruz buru aritu baitziren deman (2006).[6]

Lizarra eta Estellerriko euskararen aldeko Garean elkarteko kide ere izan zen Mentxu, 2008an hurbildu zen, elkartea Mintzakide egitasmoa martxan jartzeko prestaketa lanetan ari zenean. Bera izan zen lehenengo dinamizatzailea. Lizarran Kantuz ekimenean ere partaide aktiboa izan zen.[7] [8]

Diskografia[aldatu | aldatu iturburu kodea]

  • Faborez, 2012. [5]

Erreferentziak[aldatu | aldatu iturburu kodea]

  1. dantzancom. «Mentxu Alkorta dantzaria eta soinujolea hil da» dantzan.eus Noiz kontsultatua: 2021-01-26.
  2. «Mentxu Alkorta dantzaria eta soinujolea hil da» Argia Noiz kontsultatua: 2021-01-26.
  3. Mentxu eta Gema trikitilari bikotea. Gara, 2000.
  4. «Mentxu Alkorta Arzak hil da, trikitiaren munduan bide urratzailea» Oarsoaldeko Hitza 2021-01-25 Noiz kontsultatua: 2021-01-26.
  5. a b «'Faborez 05+bat' diskoa: soinujole beteranoei entzuteko aukera» El Diario Vasco 2012-07-07 Noiz kontsultatua: 2021-01-26.
  6. «euskalherria.com - GARA - Paperezkoa: 20061112 Kultura» gara.naiz.eus Noiz kontsultatua: 2021-01-29.
  7. El euskara se hace oir en la calle. Noticias de Navarra.
  8. kotarro. (2021-01-26). «Garean elkarteak bere kide bati agur esan behar izan dio: Mentxu Alkorta» Kotarro Noiz kontsultatua: 2021-01-29.

Kanpo estekak[aldatu | aldatu iturburu kodea]