Mieltxo Saralegi

Mieltxo Saralegi
Bizitza
Jaiotzako izen-deiturak	Mieltxo Saralegi Arribillaga
Jaiotza	Leitza, 1968ko otsailaren 2a (58 urte)
Herrialdea	Nafarroa Garaia, Euskal Herria
Familia
Haurrideak	ikusi Kristina Saralegi
Hezkuntza
Hizkuntzak	euskara gaztelania
Jarduerak
Jarduerak	harri-jasotzailea
saralegi.com

Mieltxo Saralegi Arribillaga (Leitza, Nafarroa, 1968ko otsailaren 2a) Euskal Herriko harri-jasotzailerik ezagunenetarikoa da. Gaur egun, berea da munduko harri altxaketa errekorra bi eskuekin, 2001eko apirilaren 28an 329 kilogramoko harria jaso baitzuen.

Bizitza

182 zentimetroko luzera du eta 132 kiloko pisua. Baserri mundutik dator. Bere aita Estebanek aizkoraren munduarekiko zaletasuna igorri zien sei seme-alabei (Gabriel, Natxi, Marbi, Esteban, Kristina eta Mieltxo). Anai-arrebetan gazteenak, Mieltxok, fisiko pribilejiatua zuen txikitatik eta agian horregatik harriari gehiago zuzendu zuen aitak. Leitzako Udal Kiroldegian lan egiten du eta Saralegi Anaiak Herri Kirolak enpresaren erakusketen sorkuntzaren arduraduna da. Iruñako Jolaskide Kiroldegian ere aritu izan da kirol monitore lanetan.

Mieltxo Edurne Nagorerekin ezkonduta dago, Txomin Nagore futbolariaren eta Jorge Nagore pilotariaren arrebarekin. Ehiza da bere zaletasunik handiena, horregatik asteburuetan ahal duen guztietan bere eskopeta hartzen du. Mieltxoren beste zaletasunen bat Leitzako familiaren baserria da, herriaren kanpoaldean kokatua. Han, ardi latxa, antzara eta idi kopuru ederra daukate. Abere hauek erakustetarako erabiltzen dituzte Iruñean, Donostian edo beste hiri batzuetan.

Markak

Saralegiren jasoaldiak, adinaren arabera

Adina	Jasotako harria (kg)
12	80
13	100
14	125
15	150
17	200
18	225
19	270
20	275
21	280
23	290
24	312
25	320
27	322
28	324
29	326
30	327
31	328
32	329

Erreferentziak

• Datuak: Q12263543