Mozkin

Ekonomian, mozkina eragiketa edo jarduera ekonomiko batean lortzen den etekina da. Funtsezko aldagaia da enpresan; izan ere, ekonomian enpresek beren mozkinak maximizatzea bilatzen dutela esan ohi da. Oro har, honela kalkulatzen da:

Mozkina=Sarrerak-Gastuak

Ekuazio horretako bi elementu nahasi ohi dira: mozkina eta sarrerak. Diru-sarrera jasotzen den diru guztia da, baina sarrera jaso duenak hainbat gastu ditu eta horregatik diru-sarrerei gastu horien balioa kenduta etekina eskuratuko da, hau da, eragiketa guztien ondoren duen diru gehigarria. Enpresentzat garrantzitsuagoa da mozkina maximizatzea sarrera maximizatzea baino, lehenak gastuen minimizazioa ere adierazten duelako.