Nacka Strand

Nacka Strand
Nacka Strand
Mota	hiri-barruti
Geografia
Koordenatuak	59°18′59″N 18°09′38″E / 59.31651°N 18.1605°E
Estatu burujabe	Suedia
Suediaren banaketa administratiboa	Stockholmgo konderria
Suediako udalerria	Nacka

Nacka Strand ("Nacka Hondartza") Suediako Stockholm konderrian dagoen Nacka udalerriko barruti bat da.

Historia[aldatu | aldatu iturburu kodea]

Gaur egungo Nackako hondartza dagoen eremua jatorriz Stora Sickla landetxearena zen. 1860ko hamarkadan, Saltsjön badian lursail batzuk banatu ziren udako aisialdirako: Gustafshög, Jacobsdal, Augustendal eta Ellensvik izena eman zitzaien. 1899an, JV Svenson industria gizonak Augustendal eta Jacobsdal erosi zituen fabrika bat bertan eraikitzeko; kerosenozko motorren bujiak ekoizten hasi ziren.

Enpresak arrakasta handia izan zuen, eta 1916rako 500 langile zituen; Suediako lantoki handienetakoa zen. Behargin gehienak enpresaren etxebizitzetan bizi ziren, Augustendalen eta ondoko Vikdalen-en. Svensonek industria-paternalismo eredua jarraitu zuen, etxebizitzez gain langile kooperatibismoa bultzatuz; eta bere enplegatuen artean oso estimatua zen.

Halere, 1922ean porrot egin zuen, eta enpresa Handelsbanken banketxearen esku geratu zen. Honek 1929an Munktells auto fabrikari saldu zion. 1937an, Gunnar Philipson enpresariak hartu zuen eta negozioari bultzada eman zion, besteak beste, DKW, Dodge eta geroago Mercedesen muntaketa-lantegi gisa.

Augustendaletik Nacka Strandera[aldatu | aldatu iturburu kodea]

1980ko hamarkadaren erdialdean Philipsonen familia-enpresa berregituratu zen, eta ondasunen kudeaketan interesa zuten akziodun berriak sartu ziren. Enpresa berri bat sortu zen (Arcona) nagusiki higiezinen negoziorako, eta autoen konpainia haren filial bihurtuz. Nackako udalak Stockholm inguruan lantoki eta etxebizitza berriak garatzeko interesa zuenez, Arconarekin lotu zuten operazioa.

Hirigintza lanak 1988an hasi ziren; auzo berriak Nacka Strand izena hartu zuen. Fabrika-eraikin zaharrenetako batzuk kontserbatu eta erakusketa-areto, hitzaldi-gune eta auto-museo bezala berrerabili ziren (hala ere, Nacka Strand Bilmuseum izenekoak ibilbide motza izan zuen, eta 1992rako itxi zen).

Barrutia gaur egun[aldatu | aldatu iturburu kodea]

Gaur egun, Nacka Stranden bulegoak eta etxebizitzak daude. 1980ko hamarkada amaieratik Telia Sonera teleoperadore enpresa handiaren instalakuntzak egon ziren bertan, baina 2005ean joan ziren. ^[1] Saltsjön ertzean, Waxholmsbolaget-en itsasontzi konpainiaren portua dago, eta Suediako Cruiser Klubaren bulegoa.

1995etik, kirol portuan Carl Milleren "Aita Jainkoa Zeruko Arkuan" eskultura dago, 23 metroko altuerakoa, Nacka Strand-en bereizgarri bihurtu dena.

Egun, jantzigintza arloko hainbat enpresa daude bertan, eta Stockholm Fashion District izenekoa bultzatu nahi da, Suediako Merkataritza Elkartearekin batera.

Hainbat eskola ere badaude, hala nola lehen hezkuntzako Nazioarteko Eskola Ingelesa eta bigarren hezkuntzako MediaGymnasiet, Nacka Enskilda Gymnasium eta Praktiska Gymnasiet Nacka ikastetxeak.

Itsas Poliziak ere Nacka Strand-en portua dauka.