Polimatia
Polimatia (grezieraz, πολυμαθία, polimathía, "asko ikasi"; μανθάνω, mantháno, "ikasi" eta πολύ, polí, "asko") zientzia eta humanitateetako hainbat alorretako ezagutzak barne hartzen dituen jakintza da. Polimata bat (grezieraz, πολυμαθής, polimathés) hainbat alorretako jakintza duen norbait da. Antzinaroko filosofo asko polimatak ziren, gaur egun izendapena erabiltzen den modura ikusiaz, haietako askok jakintzaren alor ugari jorratzen baitzituzten.
Maiz, "jakintsu" edo "Pizkundeko gizona" izendapenen parekidetzat erabiltzen da, eta gutxiagotan "homo universalis" (latinez "espiritu unibertsaleko gizona"). Kontzeptu hori Italiako Pizkundean garatu zen (uomo universale).
Ideia Humanismoaren oinarri garrantzitsuenetako bat da, gizona izaki ahalguztiduntzat hartzen baitu, garapenerako gaitasun mugagabeekin, eta jendea jakintzaren alor guztiak jorratu eta beren gaitasunak muturreraino garatzera bultzatzen zituen. Arrazoi horrengatik, Pizkunde garaiko gizon askok kultura eta arteak nabarmenki lorarazi zituzten.
