Mikmak

Míkmaq nazioaren bandera.

Míkmaq, Mi'kmaq edo mikmak (mikmakeraz: míkmaq, míkmaw edo mìgmao) Ipar Amerikako amerindiar komunitate edo nazioa da, Kanadako First Nations-etako bat delarik. Gaur egun, estatuen mugei dagokienez, Brunswick Berrian, Ternua eta Labradorren, Eskozia Berrian, Eduardo Printzearen Uhartean eta Quebecen bizi dira Kanadan; eta Mainen, Ameriketako Estatu Batuetan.

Suposatzen da gainerako amerindiar herri guziak bezalaxe, Asiatik etorri zirela, hamar mila urte inguru daramatzatelarik lur horietan. Orain dela gutxi arte, herri nomada izan da, negua barnekaldeko haranetan pasatzen zuten, udan berriz kostaldera hurbiltzen zirelarik, ehizara edo arrantzara. Gaur egun, batez ere kostaldean arrantzan jarduten dira eta "kanoen herria" deitu izan zaie.

Mik'maq herria 40.000 pertsona inguruk osatzen dute, eta horietatik gutxi gorabehera 11.000 algonkin hizkuntzen hiztun dira, zehazki mikmakerarenak. Antzina hieroglifo idazkera erabiltzen bazuten ere, denborarekin latindar alfabetoa bereganatu zuten.

Gaur egun erreserbetan daude egituratuta, erreserba horiek dutelarik nazio izaera. Hori dela eta, erreserba horietatik kanpo bizi direnek ez dute mi'kmaq identitate ofizialik.

Aipatzekoa da herri haren eta euskal arrantzaleen arteko harremanen ondorio izan zen algonkin-euskara pidgina, XVI. eta XVII. mendeetan erabilia.

Lurraldea

Lurralde historikoak.

Nazioaren zazpi lurraldeak hauek ziren: Kespukwitk, Sikepnékatik, Eskíkewaq, Unamákik, Piktuk aqq Epekwitk, Sikniktewaq eta Kespékewaq. Hala ere, Frantziar eta Britainiar inperioen aurkako gerren ondorioz, XVI. mendetik aurrera lurraldea etengabe galduz joan ziren.

Kanpo loturak

Wikimedia Commonsen badira fitxategi gehiago, gai hau dutenak: Mikmak

• (Mikmakeraz)(Ingelesez) Sean Haberlin, Eunice Metallic, Diane Mitchell eta beste: Mi'gmaq Online hiztegia. 2010-10-25ean eskuratua.