Histamina

Histamina histidina aminoazidotik gorputzak sintetizatzen duen substantzia da, zenbait prozesu fisiologikotan parte hartzen duena. Besteak beste, erreakzio alergikotan, nerbio-bulkadaren transmisioan eta urdaileko fisiologian.

Sintesia

Histamina histidinaren deskarboxilazioaren ondorioz eratzen da.

Histidinaren bilakaera histamina bihurtzeko, L-histidina deskarboxilasa entzimak sustatua

Hipofisi eta hipotalamoaren neuronek ekoizten dute substantzia hau, eta baita mastozitoek eta granulozito basofiloek. Mastozitoak ehun konjuntiboan eta odol-hodietako endotelioan dauden zelulak dira, eta granulozito basofiloak leukozito mota bat.

Funtzioak

• alergia kasuetan zeregin oso garrantzitsua betetzen du, bera baita prozesu alergikoetan agertzen diren sintomen eragilea.
• urdaileko fisiologian ere parte hartzen du, azido klorhidriko eta urin gastrikoaren isurketa sustatuz.
• nerbio sistema zentralean neurotransmisore moduan jarduten du.

Efektuak

Histaminak efektu hauek eragiten ditu:

• kapilarren basodilatazioa
• gihar lisuen uzkurdura
• frekuentzia kardiakoaren areagotzea
• azido klorhidrikoaren isurketa (urdailean)
• arteria presioaren jaitsiera

Histamina eta janari-intoxikazioak

Janari-intoxikazioetako mota bat, arrainaren kontsumoarekin lotuta dagoena, histaminak eragindakoa da. Histaminak sortutako intoxikazioa egoera txarrean dagoen arraina jateagatik agertu ohi da. Arrainaren bakterio hondatzaileek histidina aminoazidoa -arrainean oso ugaria dena- histaminan eraldatzen dute, eta histamina horrek alergiaren sintomak eragiten ditu.