Eskania[1] (suedieraz: Skåne) Suediako hegoaldeko muturrean dagoen eskualde (landskap) bat da. 2009ko erroldaren arabera 1.228.815 biztanle zituen. 1997an Malmöhus eta Kristianstad konderriek bat egiterakoan Eskaniako konderria osatu zen, eskualde historikoaren hedadura guztia hartu eta kudeatzen duena.
Eskania Danimarkaren menpeko lurraldea izan zen 1658ko Roskildeko Itunak Suediaren esku utzi zuen arte. Hurrengo urteetan daniarrak saiatu ziren lurraldea eskuratzen baina 1710ko Helsingborgeko porrotaren ondoren saiatzeari utzi egin zion. Suediar armadak bortxakeria handia erabili zuen eskaniarren aurka eta "atzerriko lurralde" estatusa izan zuen 1720an herrialdean behin betirako barneratua gelditu zen arte.